سَوداگِراں ناہَکّ جَتَگ
سَودا مَنی اورماڈَہ ءِ
سَودا مَنی کۆہ ءُ زِر ءِ
سَودا اِد ءِ ماہیگِر ءِ
اَرسُن نَدار اَنت دیدَگاں
دِل دُوت کَنت وَہدے مَنی
چاراں گُلێں کۆٹُنگیا
گِنداں وَتی مَن گُنگیا
لۆگ ءَ وَتی بَنداں کُج ءَ
نێست اِنت مَن ءَ چُنڈے زِمین
سَودا تَگارلاپاں جَتَگ
مێد ءُ گُلێں مَلّاڈی ئے
سَودا ھَمُک اورماڈی ئے
مِکّ اَنت مِہِل سُنٹ ءِ سَر ءَ
گْرێوَگ مَنی لُنٹ ءِ سَر ءَ
آس ءَ کُج ءَ گُژن ءِ کُشاں
مَن چۆ زِر ءِ چَول ءَ پْرُشاں
مُربَہ، مَدَگ پَشّاری ءَ
دیستَگ مُدام مَن ساری ءَ
چُکّانی چَمّ چارَگ نَبَنت
کَٹّ کہ مَنی وَردِن نَبیت
زَمزیل جَتَگ نْیامَگ زِر ءَ
ھَرچی مَنی دَست ءَ شُتَگ
سَوداگِراں ناہَکّ جَتَگ
سَودا مَنی اورماڈَہ ءِ
چِلّ ءُ کَرۆد، دَبَّندی ئے
سَودا زَبادێں کَندی ءِ
مَن بَزَّگ ءُ مَن بے وَس آں
گار آں وَتی جِند ءِ ڈَساں
لَشکَر یَزیدی اَتکَگ اَنت
سَرپَد نَہ آں مَن بۆلیاں
ٹێلَگ کہ سَکّ اَنت اَنگَتا
ساہ ءِ مَزَنلَمبێں چِشاں
تاک ءِ سَپائیں کَہچَر ءَ
بَلّ ءِ تَرَشتێں ماڈی ءَ
پُلّێں بَسۆل ءِ سُنٹسَر ءَ
جی بات ھما دَور وَشتَبێں
جی بات مَنی پیرێں پِت ءَ
سێنَگ زِر ءِ دِرتَگ گُش ئے
کَش(اِ)تَگ پَدا آم ءُ وَرۆک
مُشکُو ھَمے سێلاندی ئے
مارا وَدار پہ مۆسُم ءِ
وَژبَہتی ئے پُلّێں نِشاں
کِشتَگ مَنی مێرۆز گُل ءَ
چانگال ءِ یاتاں کَپتَگاں
ھَو ڈ ئے سَلیم گالاں بِدار
گال تَئی نَکَنت کَسّ ءَ اَسَر
ھَرچی تَئی دَست ءَ شُتَگ
سَوداگِراں سَودا جَتَگ
<سترُنگ><اِم>سَلیم بَزَّگ