ما ھَم کِشک ءَ نۆک نَہ اێں، ما ھَم زِندے رێپێنتَگ
نۆکێں دَردے ساپ کُتَگ ءُ کْوَہنێں رَنجے سَہڈێنتَگ
تَئی نازانی شَیدا بایَد پاس بِجَنت ءُ شُگر بِگیپت
تَئی زێبائی اَہدے کَرزیت ما بَسّ اُمرے گْوازێنتَگ
پہ ما زَمزیلانی زێمِر مۆتک نَبَنت کہ نازێنک اَنت
مارا اَسَل ءَ بیم نَیَیت اِنت، مارا جَنگ ءَ رۆدێنتَگ
مَن چونایا ماں نَیاراں کْوَہنێں دَرداں جاں بلے
اِے رَندی تَئی یات ءِ کُچِکّاں دْراہێں باتِن ریسێنتَگ
مَن وَ لۆٹاں اَچ تَو پَد ھَم کَسے اَتک بِکَنت اِنت بَیَیت
رَنج اِش اِنت کہ اَچ تَو پَد مَن کِشکے پَشت نَکاپێنتَگ
اِے داوایے ءُ اِے داوا اَسَل ءَ سَرجَم راست نَہ اِنت
مارا تَہنا تَئی یاتانی زَپتێں ساہَتاں رێپێنتَگ
نی کہ اَتک ئے بِچکَندانی پُلّاں پہ مَن شانک نَگُش ئے
مَن پہ رُزوائی تَئی واہِشت سارت کُتَگ ءُ واپێنتَگ
اِے وَ اُزرے جاں نَہ اِنت کہ پہ تَو جَنگ ءَ واتَرّ بیت
تَئی شَیدا ءَ چَہ تَو پێسَر ھاک ءَ گۆں وَت نامێنتَگ
ما گۆں رَنجاں سْیادی دارێں، ما گۆں دَردے بِچکَندێں
ما چَہ زُلماں پْرۆش نَوارتَگ، مارا کۆہاں مێچێنتَگ
اَسَل ءَ آزِر جێڈَہ تَہنا اِش نَہ اِنت کہ گِندَگ بیت
ما ھَم ھُشکێں شَیر نَگُشتَگ، ما جَنگَل نازێنتَگ
<سترُنگ><اِم>آزِر مُراد