ھَر شَپ ءَ یَکّێں واب ءَ گِنداں مَن
پێژگاہے مَن ءَ تَوار ءَ اِنت
دۆزواہے مَن ءَ تَوار ءَ اِنت
جَنگجاہے مَن ءَ تَوار ءَ اِنت
جُست کَنت ھَر شَپ ءَ ھَمے چیز ءَ
تَو دَرانڈێہا رَپتَگ ءِ پَرچا؟
چۆنێں تُرسے تَرا گۆں بَندۆک اِنت
چۆنێں نیمۆنے ءَ پَتاتَگ تَرا
چۆنێں بے مِہریے تَرا گۆن اِنت
نازبُوێں سَمین ءَ بے ھال ئے
چَہ وَتی گُلزِمین ءَ بے ھال ئے
اِزگُل ءُ یاسَمین ءَ بے ھال ئے
جِند ءِ ماتی زُباں شَمُشتَگ تَو
نیلَگێں آزماں شَمُشتَگ تَو
سُورمَگێں مَکُّراں شَمُشتَگ تَو
جِند ءِ مات ءِ تَرا اوں گیر نَیَیت
نِشتَگ ءِ دانکہ پہ تَو تیر نَیَیت
مَن ھَمے جێڈَگاں گۆں دْرِکّ رَواں
ھیسک ءُ ھَمپاں بَن چۆ زَہگے ءَ
ھێداں پێشانی ءِ اوں ساپ کَناں
اێرێں تْرُنداپاں دو گُلُمب گِراں
بَسّ ھَمے جێڈاں جَنگ مئے جَنگ اِنت
نُو اِے جَنگ ءَ مَن دَستے ماں کَناں
نُو اِے جَنگ ءَ وَتی کَناں کَناں
بارێں چے راز دَنت جَنگ ءِ پِڈ
چینکَدَر ساز جَنت جَنگ ءِ پِڈ
زاناں سَکّ باز جَنت جَنگ ءِ پِڈ
مارا ھَر ھالَت ءَ رَوَگ لۆٹیت
پہ زِمین ءَ وَتی مِرَگ لۆٹیت
<سترُنگ><اِم>اِزَّت اَبدال