مَنی زێدانی لُڈّۆکێں کِشار ءِ دامُن ءَ جُنزیت
مَنی مۆنجانی مانا اِنت، تَوار ءِ دامُن ءَ جُنزیت
بَلۆچِستان ءِ زێبائی
گُباراں آس کُٹّ ءَ دَنت، چِراگاں بَنگ مێچێنیت
تَہارێں زِندمانی ئے دْرَہێں آزاراں رێپێنیت
بَلۆچِستان ءِ زێبائی
بَلۆچِستان ءِ زێبائی پہ جَورێں دُژمِناں بیرے
سَباہ ءِ نَرمُکێں دَست اِنت، ھَتَمَمبازێں تاہیرے
بَلۆچِستان ءِ زێبائی
دْرَہێں اَہد ءِ گَماں مۆکیت، یَ(کّ) دابے مَلگُزارانی
گۆں گْوات ءَ چَول جَنت داِم، گُش ئے کَیپے بَہارانی
بَلۆچِستان ءِ زێبائی
بَلۆچِستان ءِ زێبائی چُنێں پُرزێمِرێں سَوتے
اَجَب رُژنائیں نازێنکے، اَجَب مَست ءُ زِرێں سَوتے
بَلۆچِستان ءِ زێبائی
مَنی کِردار ءِ اَلماس اِنت، مَنی گُپتار ءِ اِیمان اِنت
مَنی “اِنّاں”ئے ھاٹی اِنت، مَنی اِکرار ئے اِیمان اِنت
بَلۆچِستان ءِ زێبائی
وَتی مُروارِدێں کاڈانی جیگ ءِ سْرَپتَگێں پُلّے
زِمین ءِ سِنگێں دِلبَند ءَ چَہ ماہ ءَ کَپتَگێں پُلّے
بَلۆچِستان ءِ زێبائی
بَہِشت ءَ چَہ کئے ءَ زُرت ءُ جَہان ءِ دامُن ءَ بَستَگ
ھَمُک اَرواہ ءِ پُردۆچێں گُشان ءِ دامُن ءَ بَستَگ
بَلۆچِستان ءِ زێبائی
<سترُنگ><اِم>مُنیر مۆمِن