وَہد ءِ ھار ءَ بِچار بے بْرَمش ءَ
نۆک اَنت نَکش ءُ نِگار بے بْرَمش ءَ
پِگر ءُ جَوزَہ کہ بَنت بَرے دابے
اِے کئے اِنت جَنت جار بے بْرَمش ءَ
بُرزێں چَولانی مَن سَر ءَ دْرَنگ آں
بارت کُج ءَ بارێں ھار بے بْرَمش ءَ
جَنگ ءُ جاک اِنت پہ سِرتَگێں نانے
کَسّ نَدَنت گێگ ءُ وار بے بْرَمش ءَ
پێشِمام ئے اوں دین بَدَل بیتَگ
کَنت ھَرام ءَ ھِلار بے بْرَمش ءَ
کئے وَتی وادَہ ءِ پَدا جَلّیت
کئے بِکَنت اِنت وَدار بے بْرَمش ءَ
اێمِنێں جاگَہے نَہ اِنت دُنیا
کئێت مَوجاں مَلار بے بْرَمش ءَ
مَہرَم آں اِشک ءِ اَنگَر ءُ آس ءِ
مَن نَباں وار ءُ گار بے بْرَمش ءَ
سْیَہشَپ ءَ گۆں وَت ءَ سَباہے گۆں
بیت تَہاری سَہار بے بْرَمش ءَ
تَو بِگِر مِہر ءِ پَلَّو ءَ آزات
بَنت بَدَل بِلّ ئِے یار بے بْرَمش ءَ
<سترُنگ><اِم>لَتیپ آزات
2015، اَپسیکَہن، کُلبَر