ھَو، مَن نابُودے آں، بے کارے آں ڈۆبار مَن ءَ
بێدِ شۆہاز ءَ تَئی نێست دِگِہ کار مَن ءَ
کئے مَن ءَ بارت ءُ رَسێنیت مَنی ھَنکێن ءَ پَدا
تَو دَرێں شَہرے ءَ آُرتَگ، کُتَگ گار مَن ءَ
بْیا شَراباں گۆں تْرِپێں تَنگَہێں گۆناپ ءَ مَنی
بَژن ءُ بے چاڈی ئے دَنزاں کُتَگ بیگار مَن ءَ
ناز کَرز ءِ پہ وَتی سْیاہ ءُ بَزێں گْواپاں تَو
دَروَر ءَ سْیاہی ءِ بَہت ءِ مَنی پێش دار مَن ءَ
مَنِش نۆشاں کہ تَئی ھاتِر ءَ کۆہێں گَٹّ آں
جی تَرا شَہد شَہار ءِ کہ دَئے ئے زَہر مَن ءَ
مَنی اَدّیرَہ چۆ کُورَہ ءَ بُناس اِنت مُدام
ھَلک ءِ سَرگوات ءَ کئے ءَ گْوَشتَگ بِدئے بار مَن ءَ
اوست ءُ بے اوستی ءُ دِلمانَگی بارێں تا کَدی
اِے چِہ وَزمے کہ کُتَگ مُجَّتی چَمدار مَن ءَ
جان ءِ بَند بَند چۆ شَیہا وَتی داگ داتَگ بِگِند
ھانی ءِ زَیمێں دِل ءِ زێمِل آں، گۆش دار مَن ءَ
مَرگ ءِ رَہچار آں شَپ ءُ رۆچ گۆں دَرداں کِجّاں
مَلکَمُوت! نَستَگێں تَلک ءَ سْرَپ ءُ کۆپار مَن ءَ
چۆ پَلار ءَ چۆ پَتار ءَ چی ءَ پادمال بِباں
ھار ءُ تُوپاں دِل ءِ شَہکَور زِرے اوگار مَن ءَ
<سترُنگ><اِم>زَپَر اَلی زَپَر