آستینک ءَ نہ مارے نہ زِرد ءَ گَمے، چینچو تَہنائی اِنت، چینچو تَہنائی اِنت
نێست یَکّ دُژمِنے، نێست یَکّ مَہرَمے، چینچو تَہنائی اِنت، چینچو تَہنائی اِنت
اَچ مَن جُست ءَ مَکَن چۆن گْوَستَگ مَنی اێوکی ءِ سَپَر جَنگَلاں دَر پہ دَر
دُور گِنداں زَہیرانی شێنکی شَمے، چینچو تَہنائی اِنت، چینچو تَہنائی اِنت
بُلبُل ءَ گِند دَرد ءِ مَنی چُنت چیہال جَنت، چُنت پِریات کَنت، زِندَگی اِنت مَنی
یَکّ کَلێرے کَہیرے نہ پیرێں جَمے، چینچو تَہنائی اِنت، چینچو تَہنائی اِنت
ما جَساں گۆں جَتَگ، مَہپَراں گۆں جَتَگ، دِلبَراں گۆں جَتَگ، آپ ءُ آس ءَ جَتَگ
نہ گِترانگێں اَنارکے نہ چَمّی چَمے، چینچو تَہنائی اِنت، چینچو تَہنائی اِنت
کازی ھَمراہ ءُ یارانی جُست ءَ مَکَن کئے بِزانت کہ کُجام مِنزِل ءَ رَپتَگ اَنت، زِندَگ ءَ مُرتَگ اَنت
رازدارے نہ کُونجانی گارێں رَمے، چینچو تَہنائی اِنت، چینچو تَہنائی اِنت
<سترُنگ><اِم>مُبارِک کازی