اُو ڈاڈَر ءِ سَبزێں کَپۆت
پاساں زَہیریگاں جن ئے
گِند ئے مَن ءَ واب نَیَیت
چَہ ھانی ءِ بازێں گَماں
جۆش جَناں وَہد ءُ دَماں
رِنداں مَن ءَ تیرے جَتَگ
تیر ءَ مَن ءَ کاری کُتَگ
ھانی مَنی دَست ءَ شُتَگ
رِند نِشتَگ ءُ شَرت جَن اَنت
شَرتاں پہ ھانی ءَ جَن اَنت
دۆست ءَ مَنی دَست ءَ بَر اَنت
دَور دَ اَنت مارا گَماں
داگاں ماں بۆگاں، تْرُکُّلاں
مَن ھانی ءِ واست ءَ زَراں
تاکہ ھما رۆچی مِراں
بالی کَپۆت بِلّ کُوکُواں
سیدا بُرَو ماں ڈاڈَر ءَ
پێشچار بِکَن دُرّ ءِ بَر ءَ
دینار ءِ ماہێں دُہتَر ءَ
آ وَت نِشان اِنت پێسَر ءَ
اَرس ئِے نَۆشت اَنت زاہِر ءَ
شِنگ اَنت اَنارکانی سَر ءَ
کَشّ ئِے ماں کِرّ ءُ یَگّوَرا
(مَنی) ھالاں بِدئے مَہپَیکَرا
کاسِد تَو زُوتیا دَر آ
نِندَگ اِد ءِ بَسّ اِنت تَرا
بال کَن چَہ سۆلانی سَر ءَ
پَیگاماں سَر کَن چاکَر ءَ
شَور جَناں مَن اِمبَر ءَ
کایاں دَمے نَزّیگوَرا*
تَئی بازار ءِ کِرّ ءُ گْوَر ءَ
کَولے کُتَگ اَیشی سَر ءَ
گۆں زَہم ءُ پُلّێں اِسپَر ءَ
واب ئے ماں نَرمێں بِستَرا
گۆں دُرنِجاتێں دْرَمگوَرا
وَشوابیا نَیلاں تَرا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
*نَزّیک ءُ گْوَر ءَ
(شَئے مُرید / اَہدی شَیر)