اَتکَگ اَنت گْرانێں نَوبَت ءُ جَنگانی بَہار
دێم پہ ماتکۆہاں رَپتَگ اَنت مَلّێں سَرمَچار
گْوانک جَتَگ ڈێہ ءِ مادَرێں ھاک ءَ بَزَّگی
جَہ جَتَگ پیراں، بَستَگ اَنت وَرنایاں کَتار
مُلک بَلۆچانی پہ ھَلَو ھالَو ءَ نَرَوت
مَشکَتی ھَلوایے نَہ اِنت رِندانی دَیار
داں جَہاں ھَست اِنت نام مئے دَہر ءَ ھَست بیت
وَہد ءِ دِلبَند ءَ نَکش اَنت مئے پێشی یادگار
کَہن ءُ کُمبانی آپ مئے آپِ زُمزُم اَنت
چۆ بَہِشت ءَ اَنت مئے چَراگجاہ ءُ مَلگُزار
زِر چۆ اَدێنکا دْرَپش دَنت رۆچ ءِ دیگَر ءَ
گْوات مَنی ڈێہ ءِ باڈَئی بَنگانی مَلار
دُژمِن ءَ داشتَگ چَمّ وَتی پہ مئے بُندَر ءَ
کۆہ بِبَنت یاکہ تْیابدَپ ئے سۆراپێں ڈَگار
یا بِبَنت دار ءُ ڈَنگَر ءُ بُوچ ءُ ڈۆک ءُ ڈَل
گِل بِبَنت یاکہ بَندِن ءِ زِبرێں رێگزار
کَلمَتی چِبّ ءَ جۆڈ کَنت بان ءُ بادگیر
بُرز ماں باتێل ءَ شِنگ بَنت رَنگانی گُبار
شَبدَرے مانیت پہ وَتی پَدرێچاں نَلێنٹ
کُبلێں پازگاہاں بَند بَنت آجُوێں تَلار
پہ بَلۆچانی پُشپَداں دُنیا تَنگ بیت
اَلَّما رۆچے مئے گۆں بَدواہاں جَنگ بیت
<سترُنگ><اِم>مُبارِک کازی