کَیپ ءِ گَپّ ءَ کن ئے، اِشک ءِ نام ءَ گِر ئے، جَنگ بِندات بیت
دَرد نۆش ئے تا کَد، واب چینچو گْوَپ ئے، جَنگ بِندات بیت
زێمِراں گۆں چَم ئے، یا گۆں نَکشاں بَل ءِ، جَنگ بِندات بیت
اِزم ءِ زێبائی ئے دامُن ءَ نِشتَگ ءِ، جَنگ بِندات بیت
اَچ کئے ءَ جِستَگ ءِ، تَو وَتی باتِن ءَ ، پۆلَگ ءَ ئے کئے ءَ
نوں تَو بال ءِ دِل ءَ یا چِراگ ءَ کُش ئے، جَنگ بِندات بیت
جَنگ بِندات بیت گۆں مَلاراں وَتی دَست ءُ دْرۆتے بِکَن
واب گِند ئے اگں دَرد مانا کن ئے، جَنگ بِندات بیت
جَنگ ءِ مۆسُم کہ بیت زِرد ءِ بے چاڈیا، وَہد ءِ نازُرکی ءَ
کاگَدے ءِ سَر ءَ ھَم نِبِشتَہ کن ئے، جَنگ بِندات بیت
کِسَّہانی ھَتَم دَہر ءِ دَمکاں گْوَزیت، آس باہَند کَنت
زێمِر ءِ مِہلَب ءَ وَہد ءِ جیگ ءَ مُش ئے، جَنگ بِندات بیت
سِلکێں وَسواسے ءِ دامُن ءَ گۆں اَڈ ءِ، جَنگ بِندات بیت
جێڈَگانی وَتی آزمانے گْوَپ ئے، جَنگ بِندات بیت
زِند داوایے ساچان ئِے کُرتَگ دْرَہێں ھَلک ءُ ڈَنّ ءُ دَمَگ
تَو اگں مُرتَگ ءِ، تَو اگں زِندَگ ئے، جَنگ بِندات بیت
مارے بیت شێپ گیپت، جِنگُلے ءِ وَڈ ءَ ناگَت ءَ بال کَنت
تَو کَبَسّ ءِ تَہا کَمُّکێں ھَم سُر ئے، جَنگ بِندات بیت
مَن اوں رَد کَپتَگاں، تَو اوں رَد کَپتَگ ءِ، دَرد آسَر نَبُوت
مَن پَدا رَد کَپاں، تَو پَدا رَد کَپ ئے، جَنگ بِندات بیت
جَنگ بِندات بیت وَہدے چَمّ ءِ تَہا شُونز بَندیت گَمے
تَو کہ اَکس ءِ وَتی چارَگ ءَ دَم بَر ئے، جَنگ بِندات بیت
تُرس پہ تالِہ ءَ اِسپَرے تَ نَہ اِنت، جَنگ زێبائیے
کَسّ سَلامَت مَبیت، تَو مَلامَت مَب ئے، جَنگ بِندات بیت
جَنگ ءَ سَر گِپتَگ ءِ چارَگ ءَ اَنت تَرا زیک ءُ باندات مئے
یَکّ دَمانے اوں تَو چَمّاں اَندَر بِب ئے، جَنگ بِندات بیت
کَدِّ اێشاں نَبَئے، اِے چِرِتّاں مُنیر زێمِرێنتَگ شَپے
یار گَپّے بِکَن، اِینچ ھامۆش بَئے، جَنگ بِندات بیت
<سترُنگ><اِم>مُنیر مۆمِن