ناں ماہے ھَست مَن ءَ نَئکِہ کَلکَشانے ھَست
تَرا بِگِند ئے بَہارنَوبَتێں گُشانے ھَست
بْیا راجی جُنز ءِ تَہا ھَردُکاں ھَوار کَنێں
تَرا یَکّ چاگَلے ھَست اِنت، مَن ءَ گِدانے ھَست
اِے اِشک چۆنێں وَبالے یَلَہ نَکَنت مارا
مئے وَشبُوانی تَواراں اوں زِندَمانے ھَست
نی آزماں ھَمۆدا بِشَنزیت اِستالاں
ھَمۆدا تاسے ءُ پیرزال ءِ سْرُومَدانے ھَست
ھَلیج ءُ یُورُپ ءِ گَنجێں نِدارَگاں بات ئے
مَنی کَپۆتاں یَکّ شاہاپے، زامُرانے ھَست
شُدیکێں گۆکے ءَ پۆستاد دِل نَبُوت وَرَگ ءَ
گۆں راستی باسک ءَ مَن ءَ اَبرَمی شِگانے ھَست
مَن سِتر پۆشاں ھَمُک رۆچ بْرَہنَگێں واباں
مَنی زِمین ءَ کَتارساچێں دۆدمانے ھَست
زِمین ءِ ھۆن ماں کۆہانی چَمّاں رِچَگ ءَ اَنت
پہ اِنکِلاب ءِ زِہاں تیرشَلێں کَمانے ھَست
چِراگ چۆنَہا آدێنک ءِ پاکێں آیات اَنت
نَواب ءِ اَہد ءَ کَلَموارِسێں جَہانے ھَست
<سترُنگ><اِم>رَپیک نَواب