مَن نَزاناں کہ شَمۆشَگ تَئی پَرچا گران اِنت
مَن نَزاناں کہ شَمۆشَگ تَئی پَرچا گران اِنت
مِہر آ مِہر اِنت کہ آ زانت ءِ نَبُوتَگ لۆٹۆک
یَکّے دَر گێج مَمَنّیت مَن ءَ بارێں گَنۆک
زِند ھَلّیت بلے کئے گُشیت زِند اِنت ھَلّۆک!
اِے گَنۆکی کہ پہ مَن زِندے ءِ دَر گێجۆک اِنت
اِے گَنۆکی کہ مَنی بَندیگِری ئے سۆک اِنت
اِے پہ بِہ کْوَہن نَبیت اِے پہ مُداماں نۆک اِنت
مَن کہ مَن زِند ءِ مَتا ءَ بَرے بے ھال کَناں
مَن کہ مَن بُرز ءِ ھُدا ءَ بَرے بے ھال کَناں
زِند ءِ دارۆکێں اِے ساہ ءَ بَرے بے ھال کَناں
مَن نَزاناں کہ شَمۆشَگ تَئی پَرچا گران اِنت
<سترُنگ><اِم>ھاں سابِر
مارچ-1978، پَنجگُور