دْراہێں دُنیا زِرے ءِ لاپ ءَ اِنت
زِندَگی گران اِنت بۆجیگانی تَہا
رۆچ نامَہرَمانی سِتر ءَ کَنت
ساہِگاں وَشّ وَشّا کِنزێنیت
کاینت کَبر ءِ سَر ءَ مَنی بالۆ
سُتکَگێں بانزُلاں وَتی چار اَنت
زامُران ءَ اگں بُگواریت ھَور
دَنت زاہے نِہِنگ دَریا ءَ
شیر شَنزیت گُلزِمین ءِ سَر ءَ
ماہ ءِ دێم ءَ نَزاناں کئے چُکّیت
چاریت رۆچ ءَ وَتی دِل ءَ چاریت
رۆچگوارچُک نَزاناں چے جێڈیت
اێشی ئے واجَہ چۆن بَہِشت ءَ رَوت
اِے کَبا داگ داگ ءُ پۆلِنگ اِنت
مارا ھامێن ءَ یات کا ئے تَو
پِر کَن اَنت مَچّ زێوَر ءُ سَہتاں
بْرَہنَگیا اوں مۆسُمے ھَست اِنت
تاکرێچ ءَ بِچار گۆں دْرَچکاں
وابجاہ اِنت بالی مُرگانی
مئے چِش ءِ جاں کُنٹَگ ءَ پُرّ اِنت
<سترُنگ><اِم>مَنزُور بِسمِل