جِند ءِ ساہِگ مَنی مِہمان اِنت، ھُدا ھَیر بِکَنت
مَرچی مۆسُم گَل ءُ شادان اِنت، ھُدا ھَیر بِکَنت
اَنچێں تُوپانے سَر ءَ رَسِتَگ کہ ھِچّ گَپّ نَبیت
ھَرکَسّ پہ دێم پَرێشان اِنت، ھُدا ھَیر بِکَنت
شْوانَگ ءَ چُکّ وَتی شَہر ءَ پہ تَبیب ءَ بُرتَگ
گُرک مێشانی نِگَہپان اِنت، ھُدا ھَیر بِکَنت
تَو کہ سَرپَد نا ئِے اِمرۆز ءِ تَب ءَ جَزم بِزاں
مِہر ءِ سَودا پہ تَو تاوان اِنت، ھُدا ھَیر بِکَنت
کاپِرے نێست چَہ دَپ ءَ دَر بِکَنت راستێں دانکے
سَرجَمێں دَہر مُسُلمان اِنت، ھُدا ھَیر بِکَنت
<سترُنگ><اِم>مُبارِک کازی