ھِچّ چیز دِل ءَ تاہیر نَدَنت
نہ ٹَہل ءُ کِہێب، نہ کَیپ ءُ شَراب
نہ سَوت ءُ گَزَل، نہ چَنگ ءُ رَباب
نہ چَول ءُ سَمین، نہ جَمبَر ءُ نۆد
نہ ماہ گۆں لَہمێں بِچکَنداں
نہ پَور ءُ کُتُب، نہ کَلکَش ءُ بام
پہ مَن گۆں رَگاماں بے مَتلَب تاکرێچ ءُ ھَزّام
نہ رێک ءُ تَیاب، نہ بَلّ ءِ کَپۆتانی کُوکُو
نہ سْرَپتَگێں پُلّانی وَشبُو
نہ رۆچ مَنی اَندۆہاں زانت
نہ شَپ مَنی دَرداں مانا کَنت
مَن تَہنا تَہنا جێڈاں آں
چۆ سْیَہمار ءَ چاگِرد دَجیت
ھَر زێد ءُ نِدارَگ اَرس شَلیت
ھِچّ چیز دِل ءَ تاہیر نَدَنت
<سترُنگ><اِم>مُبارِک کازی