نوں پَشۆماں آں پَشۆمانی کُتَگ
کَمّ کَمّا باز نادانی کُتَگ
شَیہ ئے پَیم ءَ سَر نَکَشتَگ* مَکَّہا
مَن ھَیالے زُرتَگ ءُ ھانی کُتَگ
گۆں نَکَپتاں بالی مُرگانی رَم ءَ
مَن وَت ءَ کۆنجے ھُراسانی کُتَگ
کْوَہنێں کَندیلے گَمانی بالِتَگ
شَپتَہارا رۆچ مَہکانی کُتَگ
زِندَگی بێزار چَہ زِند ءَ وَتی
مُردَگاں لاشے کَمَرزانی کُتَگ
وَپتَگ شْوانَگ پہ کَرار کانچ ءِ گِس ءَ
مێہَڈ ءِ گُرکاں نِگَہبانی کُتَگ
چے بَرۆسَہ ساہِگ ءَ کۆپَگ بِدَنت
کازی ءَ جِند ءِ کُرانوانی کُتَگ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
*نَکَشِّتَگ
<سترُنگ><اِم>مُبارِک کازی