گُل دَر اَتکَگ تَرّ ءُ تاب ءَ اێوک ءَ
ماں بَہار ءَ بے ھِجابا اێوک ءَ
نێمشَپ ءِ سارتێں سَمین ءِ مۆلُماں
پَدّرَہێنت مارا چَہ واب ءَ اێوک ءَ
چۆن گْوَزیت ماں شانتَگێں اِے رَنج ءِ شَپ
بے تَئی اوست ءِ شَراب ءَ اێوک ءَ
دَروَر ءَ بْیارێں کُج ءَ چَہ، ما تَئی!
دَر بِبارت مِہر ءِ کِتاب ءَ اێوک ءَ
کئے وَتی ھَیسی سَر ءِ رَکّێنَگ ءَ
دَر شُتَگ گَنجێں گَیاب ءَ اێوک ءَ
آ تَمَردێں سَرمَچار، بے لاں، کُج اِنت؟
کہ بِدَنت دَہَر ئے جَواب ءَ اێوک ءَ
چَول پُرسیگ اَنت سَبزێں سانوَڈ ئے
لێپَگ اِنت اِے کئے تَیاب ءَ اێوک ءَ
بِلّ مَن ءَ زِند ءَ گۆں ھَمکۆپَگ بِباں
تَو بِکَٹّ مُلا سَواب ءَ اێوک ءَ
جُست مَکَن، ساہِر، کہ مَن کَئی ھاتِر ءَ
سَگَّگ ءَ آں اِے اَزابا اێوک ءَ
<سترُنگ><اِم>مُراد ساہِر