(گِلَّہے گۆں اَمیر مُاویَہا)
ھَیال ءِ پَہکێں آزماں
گِپت سْیاہێں جَمَّراں
گَم ءِ گَمے رُداں بیت
دِل ءِ ڈَگار ءِ ناپَگ ءَ
ھَزار سال گێش مَن
تَہاریاں گۆں چێر ءُ سَر
مَن پَرچا ماں گیشِتاں ؟
مَن پَرچا گیشَگ ءَ نَہاں ؟
دِل ءَ گۆں دْریکَگ ءَ نَہاں ؟
مَنی چی ءَ مَنی نَبیت !
مَن چَمّاں چۆن بِداراں پہ
اَرَستُو ءِ سَرامَداں
ناں واناں کانٹ ءُ ھَیگَلا
وَت ءَ را رێپ دات باں!
پَدا مَن کایاں پہ تَرا
پَکیردرۆشُمێں ھما
مُجاہِدانی پۆلَگ ءَ
کہ راستی ءِ پَناہ اَت اَنت
ءُ واہَگ ءِ لِکاہ اَت اَنت
ھَمے پَداں گِراں باں
پہ ھُبّ ءُ واہَگے رَواں
کہ گِنداں دْراجێں پَٹّے ءَ
سَواسے کَپتَگ سِستَگێں
ءُ نۆک ءُ اَنّیگێں پَدے
زِمین ءَ اێر کَشِّتَگ
گۆں گِلَّہێں زُباںے ءَ
شَپانی واب ءِ کیمَت ءَ
چِڈِکَّہے دِل ءَ گْوَزیت
پَدا مَن ءَ را دْرۆہِتَگ
پَدا مَن ءَ را دْرۆہِتَگ
<سترُنگ><اِم>لَتیپ آزات
11 سَتَمبَر 2025