چِراگپۆشێں اُمێتانی پاسپاں بَیاں*(1)
مَن آزمان ءَ چَہ لَڈّان ءُ آزماں بَیاں
اِے کۆہ کہ شیرَگاں پِٹّێنیت شیرکِنی ءِ وَتی
مَن شَہر ءِ کُچَّلێں کَیپاں چے بے اِناں بَیاں
تَئی دیدَگانی بَلۆکێں بَشارَتاں چَہ جُتا
مَن ءَ گُماں نَبُوتَگ کہ بے گُماں بَیاں
مَنی تَوار تَئی بادگیر ءِ شان ءَ جُمبێنیت
بُتے نَہ آں کہ ماں چارّاہے بے زُباں بَیاں
داں آس چَمّ ءِ اَبێل ءَ وَت ءَ نَدَنت جاگَہ
کُج ءَ اِے کَور رَوانی ءَ شاہِگاں بَیاں*
مَن چینچو رَنگ ءَ رَجێنتَگ وَت ءَ پہ تَئی رَنگاں
بَرے کِتابے ءِ سَرپۆش، بَرے کَماں بَیاں
اِے کۆہ ءُ کَور تَئی پادانی بۆسَگاں پہ زَر اَنت
اِے کَلَّگانی اَنارپُلّ گیمُراں بَیاں*(2)
کَپۆتے ءَ مَن ءَ گْیابان ءِ گُشتَگَت کاسُم
اِے کۆہ اِد ءَ چَہ بِلَڈّ اَنت مَن بے زُباں بَیاں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
(1) *بَیاں بِزاں "باں"
(2) *بَ اَنت (بَنت)
<سترُنگ><اِم>کاسُم اَرماں