دِل ءِ واہَگ اِنت کہ دَرَیت شَپ، دَہ ءُ چار ئے ماہ پَدی بِبیت
تَو زَران ءَ بْیا ئے چۆ مِہلَب ءَ ھما رۆچ بارێں کَدی بِبیت
ماں ھَیالاں وَہدے تَو اێوک بَئے، چۆ چِراگ ءَ سَرشَپ ئے رۆک بَئے
دِل ءَ بِلّ کہ بیت دِل ءِ لَیبجاہ، دِل ءَ بِلّ کہ باز رَدی بِبیت
کہ بِسَبز اَنت تْرانَگ ءِ رۆچپُلّ، لَدێں زِرد ءِ باگیچَہ ءَ اَمُلّ!
مَنی چَمّ ءِ مێتَگ ءُ مَلپَداں تَئی گَمانی ھَور دْرَدی بِبیت
وَتی زَہریانی زِہێنَگ ءَ گۆں زَہیراں سَنگَتی لازُم اِنت
تُری مَن بِباں، تُری تَو بِب ئے، تُری گَنجێں چاردَہ سَدی بِبیت
دِلُن زۆر جَنت کہ چۆ کاسُما، مَن بِگِنداں اَشرَپی چانَگ ءَ
تَبُن مَیل کَنت کہ چۆ پازُل ءَ پہ تَماشَہ سَیل ءُ نَدی بِبیت
وَتی دۆستانی شِگان ءُ گَم، وَتی دُژمِنانی بَد ءُ سِتَم!!
چُشێں کازیے کہ مُبارِک اِنت پَدا مُشکُل اِنت کہ وَدی بِبیت
<سترُنگ><اِم>مُبارِک کازی