ماہَل جَنِکّے شاہۆکارێں، ھَر کار ءَ وَتیا کَنت پَکّ ءَ
سُہبا مَہلَہ پاد کئێت اِنت، مَنتیت شیراں ھینزَک ءَ
بَندیت کَوار ءَ بے گاہاں، بارت شَنِکّاں چارێنیت
اِے رَنگ ءَ زاناں ھَنکێن ءِ چَمّاں کَشّیت یَکّ یَکّ ءَ
کَلّیگ ءَ زُوریت ھالیگێں تْرۆنگَلێں کانیگاں پُرّ کَنت
گْوازێنیت رۆچ ءَ ساہِگے ءَ آرت ءَ پُرانیگ ءِ تَرّ کَنت
کۆہانی ٹُلّاں تَرّیت ءُ چۆنێں دْرَچکی بَر چِنت (اِنت)
گۆں کَبگی رَواج ءُ رَپتاراں رۆزَرد ءَ لۆگ ءَ واتَرّ کَنت
ھَور ءُ گْوات ءَ ھَریَکّے سَر کَنت وَت ءَ را لۆگ ءَ بارت
نادان اِنت چۆ چۆریگ ءَ، آر ءَ نَکَنت اِنت ھِچّی سارت
جَمبَر گْرَندیت، دِل تْرَکّیت، شَہم گِرۆک ءِ بیمناک اِنت
بے تُرسا دَر کئێت پێژگاہ ءَ نِندیت تْرۆنگَل چِنت ءُ وارت
شَہر ءِ مَردُم تَئی دێم ءَ رَنگ ءُ دانَگ ءَ پَش(ت) کَپتَگ
اِے گَپّ مَن ءَ ھَیپ ءُ اَرمان اِنت، چَہ زانت ءُ زانَگ ءَ پَش(ت) کَپتَگ
سَر بُوتَگ زَمانَگ ماہ ءِ سَر ءَ میرجاں آ گِدان ءِ باہۆٹ اِنت
بیست ءُ یَکُّمی کَرن ءِ جَنِکّ اِلم ءِ وانَگ ءَ پَش(ت) کَپتَگ
<سترُنگ><اِم>میرجاں میرَل