باز وَہد ءَ دِل ءَ گُشتَگ کہ گۆں تَو ھال ءُ اِہوالے بِکَناں، بَلکێں دِل اِینچُکا اێمِنتِر بیت بلے گۆں تَو دێم پہ دێم بَیَگ ءِ ھاٹیگ نَبیتَگ۔
مَنی ھَمبَل! اِے نِمدی جَتّانی بازار ءَ چاگِرد کَنت۔ تَئی رَوَگ ءَ پَد جَتّانی بازار پُرسیگ اِنت۔ ھَرکَس کہ گۆں تَو نَزّیکّ بیتَگ یا تَرا زانتَگ ئِے آئی ءِ اَرواہ بے چاڈ ءُ اَبێتک اِنت۔
مَن ءَ بازار ءِ دێم ءَ گْوَزَگ اَبێتک کَنت، بَرے گْوَزَگ ءِ تَوکَل نَبیت ءُ بَرے بازار ءِ نێمَگ ءَ چَکّ جَت نَکَنان ءُ بَرے بَرے چَمّ چَہ مات ءِ لۆگ ءُ کاپَر ءَ نَٹَگَل اَنت داں گْوَزاں، ھما سارتێں ساہَگ کہ اود ءَ مئے یات پَشت کَپتَگ اَنت! بَرے ھَیال ءُ جێڈَگے سَر کَشّیت۔
مَن 5 اَگَست ءِ رۆچ ءَ بَیاں کُت نَکَناں! مَن اَوَلی رَند ءَ یَکّ تێوَگێں بازارے چۆ آہ ءُ زاریا دیتَگَت۔ گْرێوَگ ءُ چیووَلَگ اَت۔ 3 ءُ 4 ءَ کہ بۆد کُت تاں گِنداں کہ دِگِہ 5 ءُ 6 تُست۔ یَکّے ءَ آپ پِر رێچ ءِ ءُ گِر ءُ دار کن ئے، دِگرے بے ھۆش بیت۔ گُش ئے زانا تَئی بازار ءِ سَر ءَ آزماں کَپتَگَت!
ھَمے پَیمێں مۆتک ءُ زاریے مئے مێتَگ ءَ بازیز ءِ مَرگ ءَ بیتَگَت کہ مَن ءَ کَلَہُکے یات کَنت، بلے تَئی رَوَگ ءِ آ 3ن رۆچانی بَیاں کَنَگ مَزَنێں ھاٹیگ ءُ سَگّے لۆٹیت۔ ءُ گۆں مَن نہ مات ءِ کِسَّہ بیت ءُ نہ واجُک ءُ سَبران ئے، ءُ نہ شَہمۆک ءُ وَہید ئے… چِراگ ءُ جام وَتی کِسَّہاں شَتِّر آُرت کَن اَنت۔
ھَمبَل! تَئی رَوَگَ پَد مَن اودَ اَوَلی اَئید دیتَگَت ءُ لَہتے سیر ءُ سانگ۔ اِے وَشّیانی رۆچاں ھَرکَس وَتی بے چاڈێں دِل ءَ بے سۆبێں بِچکَندَگے وَدی کَنَگ ءِ جُہد ءَ اَت۔ کَندَگ ءُ مَسکَرا ھَم ھَست اَت بلے بے چاڈی ئے جَمبَر ھَر گْوَر ءَ ساہێل اَت اَنت۔
اَڈ ءِ! نَزاناں تَو سَہی ئے اگں نہ، مُہِبّ ءُ اُستاد شَریپ ءَ ھَم سیر کُت۔ مُردَنی اِنت مئے دِل ءَ نَگُشت بُرَوێں! بلے ما چارِت مُہِبّ ھَمبَلے ءُ اَدّا ھَمیدَہ ھَم ماتے… گُڈا مَن ءُ سَمین شُتێں۔ سیر اَت، وَرَگ ءُ چَرَگ اَت، تَچ ءُ تاک اَت۔ ساز ءُ زێمَل ئے تَوار ءُ مَردُمانی کَندَگ ءُ کْریشتَگاں بَزار سَر ءَ زُرتَگَت۔ ھَئی ءَ پہ دِہ اَت، بلے اِے جَہک ءَ جیکّ ئے تَہا بازِنے بے تْرِکّ ءُ تَوار اَت، ءُ ما بازێں اَرسیگێں چَمّ ءُ مُلُورێں دێمے ھَم دیت! ما جُہد کُت ک مئے اَندَر ءِ مارِشت ءُ ھَیال زاہِر مَب اَنت بلے گُڈّیگ ءَ ما سَبراں ڈیکّ دات گُڈا بے سۆب بیتێں!
لَپشَگ! ناکُو بۆرُو تَئی نێمَگ ءَ اَتکَگ! 5 جُلائی ءَ بێراں بُوت، ناکُو ءَ دَر گێج ءُ ھَردے کہ تَو وَتی ھَلاں دَئے ئے گُڈا مَن ءَ ناکُو ءِ ھَلاں اَلَّم بِدئے گۆں، ءُ ناکُو ءَ مَنی نێمَگ ءَ بَگَلے بارے سَلَم بِدئے۔ ناکُو ءِ مَرگ ءَ مَن ءَ تَورێنت بلے شَرّ اِنت، اود ءَ تَرا وَشتِر بی ءُ ناکُو کَماش اَت، چَہ اِد ءِ اَزابی ءَ رَکِّت!
رَُوپ! ھال ءُ اِہوال باز اَنت۔ تَئی زَہیر ءُ تْرانَگ مُدام مارا گۆن اَنت ءُ تَئی رَوَگ ءِ دَرد وَ بَیاں نَبَنت!
یَکّ وَشّێں ھالے دَیاں ک تَئی نام ءَ مێتَگ ءَ کِتابجاہے جۆڈ بَیَگ ءِ چِن ءُ لانچ بَیَگ ءَ اِنت۔ سَنگَت ءُ دۆزواہاں جُہد کُتَگ ءُ چَہ سَرکار ءَ کِتابجاہے گِپتَگ، ءُ بازێں مَردُمے ءَ ھَم پَرے کار ءَ کُمَکّ کُتَگ۔
ھَمبَل! دِگِہ وَہدے پَدا ھال بیت۔ یَکّ بَرے وَشّ اِنت۔ وَتی ھالاں زیتّ دێم دَئے کہ مارا سَکّ زَہیر کَنت۔ ءُ اگں بیت کَنت، وَتی کَندَگے اَلَّم دێم دَئے۔ دۆست بَئے، لَپشَگ!
<اِم><سترُنگ>اَماں ھَبیب