مئے وابانی دُنیا، ھَیالانی دُنیا چۆ یَکّێں دَمان ءَ بَدَل بُوت چی ءَ
دِل ءِ واہَگ ءِ ماہ ءُ سالانی دُنیا چۆ یَکّێں دَمان ءَ بَدَل بُوت چی ءَ
اِے ماتانی بَچّ اَنت، اِے شێرانی گْوَچّ اَنت پہ چَرپێں دَپارے بَہا بُوتَگ اَنت
آ بے ھاجَتێں سَرزَوالانی دُنیا چۆ یَکّێں دَمان ءَ بَدَل بُوت چی ءَ
کہ چێرا کَہیر ءِ، تَو کَپتَگ زَہیر ئے، چۆ ھَرجان ئے تیر ءِ بے بانزُل ئے
آ پێشی کَپۆدَر تَئی بالانی دُنیا چۆ یَکّێں دَمان ءَ بَدَل بُوت چی ءَ
اِے وَہد ءِ تَب ءَ بِلّ کہ مِنزِل پہ مِنزِل رَوان اِنت جاہِل، نَداریت ءُ رَوت
آ بے کِرد ءُ بُرزێں مَجالانی دُنیا چۆ یَکّێں دَمان ءَ بَدَل بُوت چی ءَ
چَہ دَریا ءِ دێم ءَ پہ نۆدی دو تْرَمپ ءَ کہ دْرَچکانی تُنّ ءَ نہ تَوجیل ءُ دَر
کَہیرانی دُنیا، چِنالانی دُنیا چۆ یَکّێں دَمان ءَ بَدَل بُوت چی ءَ
ما وابانی پُشت ءَ ، تَئی دابانی پُشت ءَ ، اَزابانی پُشت ءَ گَنۆکی کُتَگ
ما پَرچا بِزانێں شَگالانی دُنیا چۆ یَکّێں دَمان ءَ بَدَل بُوت چی ءَ
تَئی مُودانی سْیاہی، تَئی لُنٹانی بْراہی، تَئی چَمّانی شاہی کئے ءَ بُرتَگ اَنت
مئے شَیرانی دُنیا، مِسالانی دُنیا چۆ یَکّێں دَمان ءَ بَدَل بُوت چی ءَ
تَئی ڈَولی ھما گَم، ھما دِل، ھما چَمّ، ھما دۆست ءُ مَہرَم، ھما گێش ءُ کَمّ
مَنی ھَمسَرۆێں نِہالانی دُنیا چۆ یَکّێں دَمان ءَ بَدَل بُوت چی ءَ
<سترُنگ><اِم>ڈَولی بے گ
چارشَمبِہ، 31-سَتَمبَر-2003
چُربَندَر ئے دَریا