(شَہید کَمبَر مُبارِک ءِ نام ءَ )
ھۆن ءِ لۆہارێں ھار ءَ بِچار کَمبَرۆ
تَنگَہێں سَرڈَگارا بِچار کَمبَرۆ
زَرد گَشتَگ چۆ ھَلدارا باوَر بِکَن
دَزگُہار ءِ گُہار ءَ بِچار کَمبَرۆ
ساربان ءِ سَر ءِ ھۆش سَیل ءَ شُتَگ
مَہری ءِ سَرمَہار ءَ بِچار کَمبَرۆ
جِند ءِ بْرات ءَ وَتی تیرباراں کَنت
مَرچیێں سَرمَچار ءَ بِچار کَمبَرۆ
کۆدِکا بِلّ پِت ءِ زێرپاداں بیت
کۆپَگ ءَ سۆچ، بار ءَ بِچار کَمبَرۆ
نادراہ ءَ چَہ ھَم گێش بَزَّگتِر اِنت
یَکّ نِگاہے اَنار ءَ بِچار کَمبَرۆ
مَیزَران اَنت پَدا نێمَرگێں کِشار
پُلبَہِشتێں لِوار ءَ بِچار کَمبَرۆ
چۆ مَبیت سیوی گَیرانی دَست ءَ بُرَوت
چاکَر ءِ یاتگار ءَ بِچار کَمبَرۆ
مَن تَئی نام گِپت ءُ دو گُٹّ نۆشِتَگ
چارپاس ئے ھُمارا بِچار کَمبَرۆ
کازی ءَ را دو گَپّ راہِ دُنیا بُگُش
پاکێں پَروَردِگار ءَ بِچار کَمبَرۆ
<سترُنگ><اِم>مُبارِک کازی