(ماما کَدیر ئے راہ ءُ ھَمراہانی نام ءَ )
ھُدا! تَو آدَمے وَدی کُتَگ
پَدا چیَ شَمُشتَگ ءِ
پہ بَندَگی ءَ دْرَچک ءُ دار بَسّ اِت اَنت
چۆ زِندَگی ءَ مُرگ ءُ مار بَسّ اِت اَنت
ھُدا! تَئی ھَوا کُج اِنت
سَہی نا ئِے؟
ھُدا-مَدیستێں دیدَگانی جُست ءُ پُرس دَم بَر اَنت
پہ لۆٹَگ ءَ ھُدا رَسیت؟
بُلۆٹ تَو، مَرَس ھُدا
پہ دَست ءِ جَہل ءُ بُرزی ءَ مَرَس کَسّ ءَ
نَرَسِتَگ ءِ، کَدی مَرَس
رَواں کَنت اِے زِندَگی
ھُدا ءِ نام ءَ نْیادیے
ھُدا ءِ نام ءَ مێتَگے
مَسیت بیت کہ مَندَرے
ھُدا ءِ نام ءَ ھۆٹَلے
ھُدا ءِ نام ءَ ماڈیے
ھُدا ءِ نام ءَ گاڈیے
ھُدا ءِ نام ءَ دَپتَرے
ھُدا ءِ نام ءَ مَردُمے
ھُدا ءِ نام ءَ پَتَّرے
ھُدا ءِ نام ءَ پِنڈَگے
مَرَس ھُدا، کَدی مَرَس
مَسیت ءِ واجَہ ءَ مَرَس، سَر ءَ پہ لَبّ جَہل کَنت
نہ مَندَرانی گَنٹیانی ٹِلینگَگاں
اِے ھۆٹَلانی مالِکاں چۆ گُژنَگ اَنت
اِے گاڈیاں سَوار اَنگَہ پْیادَگ اَنت
اِے دَپتَرانی ھَشت-ساہتی
اِے نْیادیانی کَہبَگی
اِے پِنڈَگانی واجَہی
اِے مَردُمانی رَستَری
اِے مُردَگی ءُ مۆدَگی
مَرَس اِشاں، کَدی مَرَس
ھُدا! تَو مُرگاں رَسِتَگ ءِ
ھُدا! مَن سُہبی نِشتَگاں
تَو گْوَنڈۆانی کَندَگاں گۆں گْوَستَگ ءِ
پہ مَکتَب ءَ
ھُدا! تَو ماتے ءِ دِل ئے
کہ بَچّ ءِ لاش کَپتَگ ئِے
ھُدا! تَرا زَہیر کَنت پہ آدَم ءَ ؟
ھُدا! تَئی ھَوا کُج اِنت
سَہی نا ئِے؟
مَنی زَرینَہ بَندی اِنت
ھُدا! تَو بَیرَکانی بَندی ئے
تَئی چَمّ ءُ دَست ءُ پاد بَستَگ اَنت
تَئی تَوار بے تَوارا بُرتَگِش پہ پاہۆ ءَ
بلے تَر ءَ را کئے کُشیت؟
اِے ھۆٹَلانی گُژنَگی
چۆ مۆدَگی ءُ مُردَگی
پِنڈَگانی واجَہی ءُ رَستَری
اِے بے وَتی ءُ کَہبَگی
اِے ھَشت-ساہَتانی دَپتَری کُشیت تَرا؟
ھُدا! اِشاں نَرَسِتَگ ءِ، مَرَس کَدی
ھُدا! تَو آیاں رَسِتَگ ءِ
ھُدا! تَو آ اِنت گْوَستَگ ءِ
ھُدا! آ لاش کَپتَگێں
ھُدا! آ بْرات بُرتَگێں
ھَمبَلاں چَہ سِستَگ ءُ جِتا نَہ اِنت
ھُدا! آ گُہار نِشتَگێں
ھُدا! تَو ماتے ءِ دِل ئے
ھُدا! مَن سُہبی نِشتَگاں
تَو گْوَنڈۆانی کَندَگاں گۆں گْوَستَگ ءِ
ھُدا! تَو مُرگاں رَسِتَگ ءِ
کَپۆتی پْرُشتَبانزُلے ءَ بَستَگ ءِ
<سترُنگ><اِم>کَمبَر مُبارِک