مَرَو ھَنّی، بِنِند سَہتے
بِنِند سَہتے، مَن نَدریگ آں
بِنِند کہ نۆکجَوان اِنت شَپ
بَیان اَنت پَدَّر نۆک اِستال
دَر اَتکَگ نۆکی ماہ نۆکێں
بِچار کہ نۆکی مَہکان اِنت
پَتاتَگ چادِرے سْیاہێں
کۆہ ءُ تَلّ ءُ شێپاں نۆک
سُبَکّێں گْوات ءَ نۆک بۆتکَگ
زِمین ءِ کاگَدێں جیگبَند
مَرَو ھَنّی، بِنِند سَہتے
بِنِند سَہتے، مَن نَدریگ آں
بِنِند کہ پَر تَو تُنّیگ آں
بِنِند مَن پَر تَو کَولیگ آں
بِنِند ءُ گَپّ بِجَن وَشّێں
دِگِہ سَہتے ءُ دِگِہ پاسے
بِنِند داں شَپ بِبیت وَرنا
بِوَسپیت ماہِکاں سارتێں
بِوَسپ اَنت ھَلک ءِ مَردُم دْرَہ
بِوَسپ اَنت جَنگَل ءِ شانتُل
بِنِند کہ ھِچّ نَگُشتَگ مَن
بِنِند کہ ھِچّ نَگُشتَگ تَو
بِنِند دێم ءَ تَئی چاراں
کَناں گْوازی گۆں زُلپاں تَئی
تَرا چُکّاں دِل ءَ دَراں
دِل ءَ دَران ءُ وازاراں
بِنِند ءُ بَہر بِکَن گۆں مَن
وَتی پُلّێں تَو اِساراں
بِنِند کہ بێدِ تَو دِلبَر
پہ مَن دُنیا اِے بَدرَنگ اِنت
بِنِند ءُ ھِچّ مَتُرس مَہرَنگ
چَہ دۆد ءُ بے سَرێں رَسماں
بِنِند دانکہ بِبیت اِنت سُہب
بِگِند اَنت مارا مَردُم دْرَہ
بِبیت تالاں دْرَہێں ھَلک ءَ
ھَبَر مئے مِہر ءُ دۆستی ءِ
مَرَو ھَنّی، بِنِند سَہتے
بِنِند سَہتے، مَن کَولیگ آں
بِنِند کہ چێر بے ن تاں کَد
چَہ تُرسا مُلک ءُ مَہلُوک ءِ
وَت ءَ تاکَد کَنێں اَندێم
چَہ بیم ءَ رۆچہ رَہمان ءِ
تَہاری ءَ نَزان ئے تَو
اِے چێر ءُ اَندَرێں دُنیا
بَلاہێں وَت گُناہ چے کَنت
وَت ءَ کہ اِے گُش اَنت پارسا
وَت ءَ لێک اَنت مَلَنگ ءُ پیر
نَمَنّ اَنت ءُ گُش اَنت بِلّ ئِے
بُزِرگ ایں ما، ما دَروێش ایں
سِپێدپۆش ءُ وَلی ایں ما
پَکیر ایں ما ھُداتُرسێں
ھَتاکار ءُ گُنَہگار اَنت
اِے جیمار اَنت، اِے سْیَہمار اَنت
مَرَو ھَنّی، بِنِند سَہتے
بِنِند سَہتے، مَن نَدریگ آں
بِنِند کہ سُہب بیت بِلّ ئِے
بِگِندیت سَجَّہێں آلَم
مئے جِند ءُ مئے مِہر ءَ
مئے پَہکێں مُہبَت ءِ شَہم ءَ
مئے ھَجگێں واہَگ ءِ پُلّ ءَ
بِنِند ھَو کہ باندات ءَ
(چَہ) شَپ ءِ کُٹّ ءَ ھَوَسناکێں
سَباہ ءَ ما دَیێں مِستاگ
وَتی مِہر ءَ ما نازێنێں
دوێں رۆچاں اِے زِندَیگاں
وَتی ھۆری ءَ گْوازێنێں
بِنِند سَہتے، مَرَو ھَنّی
مَرَو ھَنّی، مَن کَولیگ آں
<سترُنگ><اِم>گُلام ھُسَین شۆہاز