کَدَم، کَدَم رَواں بِبِت
دِلێر ءُ پَہلَواں بِبِت
پہ شانِ مادَرِ وَتَن
پِدا گۆں مال ءُ جاں بِبِت
پہ نام ءُ نَنگ ءُ آبرُو
سَراں وَتی دَیاں بِبِت
پہ کَٹّ ءُ سۆب ءِ مِنزِل ءَ
کَدَم، کَدَم رَواں بِبِت
گَر آزماں شُمئے سَر ءَ
پْرُشتَگ، پُرگَزَب بِبیت
گِرۆک ءُ گْرَند ءُ ھَور ءُ گْوات
نِجێنتَگ سْیاہێں شَپ بِبیت
زِمین بِبیت چۆ آچِش ءَ
زَمانَگ بے اَدَب بِبیت
مَیارِت تُرس ماں دِل ءَ
کَدَم، کَدَم رَواں بِبِت
بِبیت اگں شُمئے سَر ءَ
گَزَب، گَزَب، سِتَم، سِتَم
گۆں زُلم ءِ زَہم ءُ بَجَّری
بِبَنت سَر شُمئے کَلَم
بِمَلِّت دێم ءَ ، دێمتِرا
پَدا شُمئے مَب اَنت کَدَم
ماں سُہر ءُ تَپتَگێں پِڈ ءَ
کَدَم، کَدَم رَواں بِبِت
تُپَنگ ءِ تیر ءُ تۆپ ءُ بَم
شُمئے سَر ءَ پہ گْوارَگ ءَ
دِل ءُ جَگَر بِبَنت دُکَپّ
نِزَر مَبیت پہ چارَگ ءَ
تَچاں بِبَنت ھۆن ءِ جۆ
پَلَک بِکَنت نِدارَگ ءَ
ماں آس ءُ دیت ءِ جَمَّر ءَ
کَدَم، کَدَم رَواں بِبِت
اِے زِندَگی گُلامی ءِ
بَلۆچ ءِ پُسَّگاں ھَرام
اِے شاں نَہ اِنت بَلۆچیێں
پِتی سَر ءِ بِبیت گُلام
بَلۆچ ءِ پُسَّگاں یَلێں
نَسیر اَرز کَنت سَلام
بِزیرِت کَوم ءِ بَیرَک ءَ
کَدَم کَدَم رَواں بِبِت
<اِم><سترُنگ>گُلہاں نَسیر