آئی ءَ وَتی سَپَر جَت ءُ اَتک لۆگ ءَ سَر بُوت۔ سُہبیگێن اَت کہ شُتَگَت، نی بے گاہ اَت ءُ آئی ءَ ھِچّ نَوارتَگَت۔
اود ءَ پہ وَرَگ ءَ بێدِ آپ ءَ دِگِہ ھِچّ نێست اَت۔ اَسَل ءَ آ چُشێں جاہ ءُ جاوَرے نَہ اَت کہ مَردُم وَرَگی بِبیت۔ اود ءَ مَردُم وَرَگ ءِ ھِچّ سُدّ ءَ نَہ اَت۔
آئی ءِ مات ءَ پَرایا وَرَگ اێر کُتَگَت۔ وَہدے آئی ءَ دَم بال ءَ کُت گُڈا مات ءَ تَوار کُت۔ “مَنی چُکّ، ھانی! بْیا اِے لۆگ ءَ ، وَرَگاں گَرم کَناں، سُبارِگ کَن کہ تَو شُدیگ ئے۔”
“اِنّاں اَمّاں! مَن شُدیگ نَہ آں۔ نی رۆچ ھَم شُتَگ۔ اَنّی نَوَراں کہ وَرَگ ءِ وَہد ھَراب بیت۔” آئی ءَ پَسَّو دات ءُ وَتی سَر ئِے لۆگ ءِ دێم ءَ اێرێں سَرجاہ ءَ تِکَہ دات۔
“مَنی چُکّ! تَئی چَمّ پَرچا چۆ سُہر تَرِّتَگ اَنت؟ تَو ھَمے کہ وَتی وانَگجاہ ءَ دیوان ءَ رَو ئے ءُ کا ئے تَئی چَمّ چۆ گُگُّو ءِ چَمّاں گْوات گِر اَنت۔” مات ءَ گۆں دِلوارَگی گُشت۔
“ماتی! وانَگجاہ ءَ مئے سَر سَجَّہێں رۆچ ءَ جَہل اِنت ءُ ما نِبِشتَہ کَنێں پَمِشکا مئے چَمّ سُہر تَرّ اَنت۔” چُکّ ءَ پہ وَشتَبی پَسَّو دات۔ پَدا جُست ئِے کُت، "اِے سَمّی کُج اِنت؟ مَن ءَ چے گْرادیت ءُ دَنت؟”
“مئے ھَمساہِگ گُلنِسا ئے جِنِکّ سُہبی نام دُکّان ءِ گِپتَگ ئِے، ءُ رَوانک ءَ شُتَگ۔ مات بارێں کئے ءَ ھال داتَگ، بیپی ءَ گِپتَگ، تُستَگ ءُ کَپتَگ۔ کَسّ ءَ نَگُشتَگ کہ رَکّیت۔ سَمّی مَن دێم دات کہ ھالا ئِے بِگیپت۔” مات ءَ گۆں بَزَّگێں گالِوارے ءَ پَسَّو دات۔
“ھاں! ماسی گُلنِسا ھَم شَرّێں ریتَّچَرزے۔ رَوانک ءِ رَوَگ ءَ زاناں چے بیت؟ ھَرکَسی ھَکّ اِنت کہ راجی رَوانکاں گۆں بِبیت۔ مَرچی آ اِنت، باندا ما ایں۔” چُکّ ءَ وَتی پاد پْرِنچانا گُشت۔
“مَن ءُ گُلنِسا گَریب این ءُ گۆں ما چُشێں کار نَبیت، مارا تُرسیت۔” مات ءَ چَمّ ڈَنّ ءَ شانک دات اَنت ءُ گُشت۔
“ماتی! شُمئے تُرسے نَہ اِنت، وَسَّرا شُمارا تُرسیت۔ ھَو! شُما مَیاریگ نَہ اِت، شُمارا تُرسیت کہ شُمئے دِل نِزۆر اِنت، بلے چُکّاں وَ بِلِّت کہ وَتی ھَکّ ءِ۔۔۔” آئی ءَ گَپّ اَنَگَت دَپ ءَ اَت۔
“تَو اَتکَگ ءِ؟ گُڈا ماسی گُلنِسا ئے جِنِکّ؟؟”
<سترُنگ><اِم>سابِدَہ بَرکَت