وَہدے ھَنکێن ءِ ھما کۆہ ءُ بُرزَگانی نَکش ءُ نِگار، سَباہانی مِسکێں سَمین، نێمسَبز ءُ جَمبَریێں آزماں، شَپانی لَہم لَہم ءَ کَشّۆکێں کَوش، دِل ءَ ھَزار اَرمان ءُ اُمێتانی جَہانے سینگاریت، ھَمۆدا ھما تَہل ءُ کُچَّلێں یاتاں کہ کَپاں گُڈا چارێں نێمَگاں دِلپرۆشی ءِ جَمبَر ماں شان اَنت۔
ماتێں گُلزِمین ءِ بُو ءُ بُس، کَور ءُ چَمَّگانی تَچۆکێں آپ، دْرَچکانی وَشّێں ساہِگ ءُ تاکانی زێبائی مَن ءَ ھَمایانی یاتاں پِرّێن اَنت کہ مَن آیانی چارَگ ءُ دیدار ءَ تَلوَسَگ ءَ آں۔ اَنچۆ گُماں بیت اِے نِدارَگ ءُ یاتاں مَنی رُوہ تَہارَگانی مَیار کُتَگ۔ مَن اَنچێں بے وَسێں مُرگے آں کہ بیمناکێں ڈَبّے ءَ بَند کَنَگ بُوتَگ…کہ آ، وَہدے وَتی ھَمراہاں آزمان ءِ دێم ءَ بال ءَ گِندیت گُڈا وَتی بے وَسی ئے سَر ءَ بَژن وارت۔
اِے رَنج ءُ گَمانی پَنجَگ ءَ کہ مَنی اَہد بَستَگ، اِے وَشّی ءُ شادِہانی زِبَہری نَہ اِنت بَلکێں مَنی اِے گَم ءِ سَوَب مَنی رُوہ ءِ تَہا نِشتَگێں ھما جَزبَگ اِنت کہ مَن ءَ واب ءِ ساچَگ ءِ ھێل ئِے داتَگ۔ اِے جَزبَگ مَنی ھَمُک جَزبَگ ءِ بُنزِہ اِنت کہ آئی ءَ مَن ءَ چۆ زِر ءَ جُہل ءُ شاہِگاں کُتَگ، یَکّ اَنچێں زِرے کہ آ سْیاہێں مُجاں گِپتَگ۔ اود ءَ نَئکِہ دَرے گِندَگ بیت ءُ نَئکِہ وَشّێں نِدارَگے۔
اِے مَنی دُمی زِند اَت پَرچا کہ اِنساں ھَمُک سال یَکّ نۆکێں زِندے پہ وَت شۆہازیت۔ اگں آئی ءِ زِند بَدَل مَبیت گُڈا آئی ءِ زِند یَکّ کِتابے ءِ اَنچێں تاکے ءِ وَڈ ءَ بیت کہ اود ءَ زێبائی، وَشّی، گَم، نِدارَگ ھِچّ گِندَگ نَبیت، اێوک ءَ یَکّ گیمُرتَگێں رُوہے کہ نہ سُرَگ زانت ءُ نَئکِہ جَزبَگانی مارَگ۔
اِے ھما سال ءِ گَپّ اِنت کہ مۆسُم بَہارگاہ اَت۔ باگانی تَہا زێبائیں پُلّانی وَشبُو تالان اَت ءُ سَبز سَبزێں ھُداکاہاں گۆں سَمبَہێنتَگێں زِمین کہ اَنچۆ گُماں بَیَگ ءَ اَت گُش ئے زِمین وَتی چێر ءُ اَندَرێں رازاں آزمان ءِ دێم ءَ پاشک کَنَگ ءَ اِنت۔ اِے نِدارَگانی ھامۆشی اَنچے ھامۆشیے کہ مَردُم ءَ وابانی دِگِہ جَہاںے ءَ بارت ءُ سَر کَنت۔ ھما جَہاں کہ اود ءَ اِنسان ءِ رُوہ ھَم چۆ گارێں مُرگے ءَ بیت ءُ رَوت دَرچکے ءِ سَر ءَ نِندیت وَتی گْوَست ءَ یات کَنت۔
ھما مۆسُم کہ مَردُم وَتی دِل ءِ چَمّاں گۆں دُنیا ءَ چارَگ لۆٹیت، ھما زێد کہ مَردُم ءَ چارێں نێمَگ ءِ رازانی کُلُہ ءَ دَنت ءُ یَکّ اَنچێں مارِشتے بَکشیت کہ اِے مارِشت ءُ زێد ھَرد آئی ءِ زِند ءِ مانا ءَ بَدَل کَن اَنت ءُ آئی ءَ دِگِہ جاہے سَر کَن اَنت کہ اود ءَ پُلّانی گْواڈَگ سْرَپ اَنت، سَباہ ءِ نۆد لَہم لَہم ءَ شَنز اَنت۔
مُرگ ءُ شاتُلانی مِستاگ کہ دِل ءَ ھَمدِلانی آیَگ ءِ اِہوالا دَ اَنت۔ گْوَست ءِ یات چۆ دْرَچکانی ساہِگ ءَ گْوَز اَنت ءُ مَردُم ءَ اَنچێں چاگِردے ءَ تێلانک دَ اَنت کہ اود ءَ مَردُم وَتی چَمّاں آدێنکے کَنت ءُ آیانی دێم ءَ اوشتیت۔
<سترُنگ><اِم>اَسما مُراد