دَپ ءِ پُلّێں ھَبَر ھۆن اَنت، دِل ءِ کۆہێں ھَبَر ھۆن اَنت
دِلُن پاہار کَنت کہ مَکَّہێں ماتانی سَر ھۆن اَنت
زِمین ءَ آپ ءِ بَدَل ھۆن رێتکَگ پُلّێں دِہکان ءَ
پَمِشکا رُستَگێں دْرَچکانی دُرسێں تاک ءُ بَر ھۆن اَنت
گَیاب ءُ کَور ءُ کیلَگ، کَہن ءُ جۆ، دَریا ءُ نیلێں زِر
تَلار ءُ کۆہ ءُ پَٹّ ءُ وَڈّ ءُ دَشت ءُ ژیمب ءُ گَر ھۆن اَنت
پہ دِشتاراں زَر اَنت نۆرُستَگێں کاڈانی ھَجگێں دِل
پہ جۆداں نِشتَگێں نازاکێں زالانی جَگَر ھۆن اَنت
مَن ءَ اِے سُہرچَمّی اَچ وَتی پێشی سَراں رَسِتَگ
ھَمے واست ءَ مَنی چَمّاں تَمامێں راہ ءُ دَر ھۆن اَنت
<سترُنگ><اِم>مُبارِک کازی