گاڈی ءِ وَدار ءَ آئی ءِ چَمّ بَند نَبیت اَنت ءُ گُشت ئِے: “ماتی! گاڈی کَدی کئێت؟”
چُکّ ءِ سَر مات ءِ کۆنڈ ءَ اَت، گْرێت ئِے: “ساہ ءِ بَدَل! دَمانُکے اوپار کَشّ، جَنگیاں گاڈی ءِ آرَگ ءَ شُتَگ۔”
“جَنگیان ءَ بُگُش دێر مَکَن۔”
گْوَنڈُو ءَ چَمّ بَند کُت اَنت۔ گْرێوَگ ءُ پِریاتاں ھَمساہِگێں دُرّی تَچاں تَچانا اَتک ءُ دیست ئِے شَیہَک ھۆنێن اِنت، سَر ئِے مات ءِ کۆنڈ ءَ اِنت ءُ چَمّ ئِے بَند اَنت۔
پِریات ئِے کُت: “چے بیتَگ ئِے؟”
“ڈَنّ ءَ لَیب ءَ بیتَگ، بے ماتاں تیر جَتَگ،” مات ءَ چَہ دِل ءِ سۆک ءَ پَسَّو دات۔
“اَبُّڈ ئے بابی! تیر ئِے کُج ءَ وارتَگ اَنت؟”
مات ءِ چَپّێں بَگَل ءَ مَستِرێں چُکّ نِشتَگَت، دَرّاێنت ئِے: “چَرَّہی ءِ تیرے بیتَگ بلے شُگر اِنت کہ چَہ دیر ءَ لَگِّتَگ ئِے، پَمێشکا مَزَنێں ٹَپّ ئِے پِر نێست بلے دِلبَند ءَ بِگِر داں پێشانیگ ءَ شۆرَواں گِپتَگ۔”
شَیہَک ءَ چَمّ پَچ کُت اَنت: “ماتی! گاڈی اَتک؟ مَن ءَ داکتَر ءَ نَبَرِت؟”
“اَبّا! دِل ءَ بِدار، گاڈی پێداگ اِنت۔”
کَسانُکێں شَیہَک جاں مارتۆسَگ اَت، ھیسکارِت ئِے: “اَمّاں! جَنگیان ءَ بُگُش دێر مَکَن، مَنی ٹَپّ سُچَگ ءَ اَنت۔”
شَیہَک ءِ گُہار پَرائی ئے دَردانی آرام کَنَگ ءَ اَلّاہ ءِ کَلام ءَ وانَگ ءَ اَت۔ چیزّے تاک ءِ وانَگ ءَ پَد نَزّیکّا اَتک ءُ آئی ءِ دێم ءَ چُوپّ ئِے کُت۔
شَیہَک ءَ گْرێت: “مَن ءَ گْوات مَکَن، سَگِّت نَکَناں۔”
“اِنّاں لالا! مَن سُورَتے وَنت، بِگِند ئے زیتّ چَہ دَرداں آرام بِب ئے۔”
گۆں شَکّیێں چَمّے گُشت ئِے: “زانا مَن ءَ داکتَر ءَ نَبَرِت؟”
“وَلُک! بُرَو ھالے بِگِر کہ پَرچا جَنگیاں اِینچُک دێر کَنَگ ءَ اِنت؟” مات ءَ کَش ءَ نِشتَگێں چُکّ پَرمات۔
وَلُک گۆں اَرسیگێں چَمّ ءُ دَردیگێں دِلے تَچاں تَچانا شُت۔ چیزّے گام ءَ پَد دیست ئِے جَنگیان ءَ بِجلی ءِ کَمبَہے گِپتَگ ءُ داشتَگ ءُ گْرێوَگ ءَ اِنت، پُرسِت ئِے: “ھَیر اِنت؟ بُرێں مَزَندَگّا گاڈیے چارێں کہ لالا سَکّ بے وار اِنت۔”
جَنگیان ءَ بْرات گُلاێش کُت ءُ گُشت ئِے: “دَروازَگ ءِ دَپ ءَ بِچار، دُزّ ءُ ڈُنگ اَنگَت نِشتَگ اَنت۔ مَن ءَ ھِچّ وَڈ ءَ رَوَگ ءِ راہ دَیَگ ءَ نَہ اَنت۔”
وَلُک دێم پہ ھما دَروازَگ ءَ شُت بلے ھَمے دَمان ءَ شَش کَسّ ءَ ماں تَرّێنت “ئے، چۆٹسَر! وَتی لۆگ ءَ بُرَو۔”
گْرێت ئِے: “شُما مَنی بْرات جَتَگ۔ مَن چَہ شُما ھِچّ نَلۆٹاں۔ مَن ءَ بَسّ بِلِّت کہ ڈَنّ ءَ رَوان ءُ گاڈیے چاراں۔”
“تَو زانا سَرپَد نَبَئے؟ اگں تَو زْیادَہێں ھَبَر کُت، اِے تُپَنگانی تیراں تَئی دَپ ءَ چَنڈێں۔”
یَکّے ءَ سیتیریے آئی ءِ سَر ءَ داشت ءُ گُشت: “بُرَو سِلگَت! شُلُکّ کہ ھَلاس بیت، وَتی بْرات ءَ داکتَر ءَ بَر۔ بِلّے اَنّی۔”
“دان ءَ وَہد ءَ آئی ءِ جِند بے بَلاہ۔۔۔”
دْرُستاں وَتی تُپَنگ آئی ءِ نێمَگ ءَ تَچک کُت اَنت بلے جَنگیاں ھَمے دَمان ءَ اَتک ءُ سَر بُوت ءُ بْرات ءِ دێم ءَ اوشتات: “مَجَنِت، ما رَوێں۔”
جَنگیان ءَ آ کَشّانرۆپ کُت۔ پَدا ھَر دوێں بْرات گۆں ناکامێں دِلے گْرێوان ءَ لۆگ ءَ اَتک اَنت۔ مات ءَ چۆ مُرگ ءَ پَرپَرُّکی جَنۆکێں شَیہَک بَڈّ ءَ کُت ءُ پاد اَتک: “جَنگیاں! تَو گاڈی کُج ءَ اوشتارێنتَگ؟”
شَیہَک ءَ گۆں پْرُشتَگێں گالوارے گُشت: “اَمّاں! مَن ءَ آرام آرام ءَ بَر۔ ٹَپّ کُد اَنت۔”
مات ءَ آئی ءِ دَست چُکِّت ءُ گُشت: “اَبّا! اَلّاہ بادشاہے! جَنگیان ءَ گاڈی ھَم آُرتَگ، بَسّ اَنّی رَوێں۔”
گُہار ءَ ھَم گُشاد گُشاد ءَ کُراں اێر کُت کہ نی ما داکتَر ءَ رَوێں بلے جَنگیاں مات ءِ چَمّاں چارَگ ءَ اَت ءُ گْرێوَگی اَت۔
مات ءَ گۆں دْرَہۆکێں لُنٹے گُشت: “جَنگیاں! دِل ءَ دَور نَگُش ئے، ھُدا بادشاہے۔”
جَنگیاں پاداں دێم ءَ نَبُرت۔ گُشادیا شَیہَک ءِ سَر ئِے چُکِّت: “اَمّاں! رَوَگ ءِ راہ نێست۔”
پَدا جَنگیان ءَ گْرێت: “ڈُنگاں گُشتَگ، ‘دانکہ شُلُکّ ھَلاس نَبیت، کَسّ چَہ دَمک ءَ ڈَنّ دَر اَتک نَکَنت۔’”
اِے رَندی، شَیہَک ءَ گۆں نێمساہێں جانے گُشت: “اَمّاں! مَن سَگِّت نَکَناں۔”
مات گَنۆکیاں گِپت، اوپار ءَ جْواب دات، چُکّ ئِے دِل ءِ پُشت ءَ داشت ءُ تَچک ءَ دَمک ءِ دَروازَگ ءِ نێمَگ ءَ شُت۔
“شُما زانا سَرپَد نَبِت؟ ما یَکّ بَرے گُشتَگ، دانکہ شُلُکّ ھَلاس نَبیت، کَسّ ڈَنّ ءَ شُت نَکَنت۔”
مات ءَ گْرێت: “مارا بِلِّت، اِے مَنی سُہر ءِ چُوڈیگ اِنت، بِزیرِت ئِے۔ مَن پہ سَکّی ءِ وَہداں وَتی گُٹّ ءَ بَستَگ بلے نی چِد ءُ مَستِرێں سَکّی مَن ءَ نَگیپت۔”
یَکّے ءَ ٹَہکے جَت ءُ ھَمے چُوڈیگ کیسَّگ ءَ کُت ءُ گُشت ئِے: “بلے مئے ھَبَر ءَ بِگِرِت ءُ لۆگ ءَ بُرَوِت۔”
بے چارَگێں مات سَریگ ءِ ھَم ھۆش ءَ نَہ اَت، گْرێوَگ ءَ اَت: “مَن شُمارا وَتی گۆر ءُ کَپَن ءِ چُوڈیگ ھَم دات، نی وَ مارا بِلِّت۔”
“ئے مَکّار ءُ دْرۆگبَندێں زالَکُو! اگں تَو زُوکَّگ کُت، شُمارا، دْرُستاں رَگبار کَنێں۔”
بے سۆب بیت اَنت ءُ دێم پہ لۆگ ءَ واتَرِّش کُت۔ مات ءَ شَیہَک لۆگ ءِ لاپ ءَ واپێنت ءُ سَر وَتی کۆنڈ ءَ کُت۔
سَہتُکے ءَ رَند، شَیہَک ءَ چَمّ پَچ کُت اَنت بلے اِے رَندی ھِچّ ئِے نَگُشت۔ اَرس ئِے اَنارکاں شَلاں بیت اَنت ءُ بَسّ۔
اَدارے ءَ پَد راہ پَچ بیت اَنت۔ جَنگیان ءَ تَچاں تَچانا چَہ مَزَندَگّا گاڈیے گِپت ءُ آُرت۔
مات ءَ گُشاد گُشاد ءَ شَیہَک بَڈّ ءَ کُت ءُ گُشت: “شَیہَک! دِل ءَ بِدار، ھُدا ھَیر کَنت۔ گاڈی ھَم اَتکَگ، نی ما دَمانُکے ءَ پَد داکتَر ءِ گْوَر ءَ سَر بے ن، تَئی ٹَپّاں دَرماں کَنت۔”
نی شَیہَک ءِ، چَہ شَلۆکێں اَرساں تَرّ بیتَگێں اَنارک ھُشک تَرِّتَگَت اَنت بلے چَمّ ئِے اَنگَت پَچ اَت اَنت۔ گُش ئے زانا گۆں مات ءَ گَپّ ءَ اَت: “ماتی! مَن ءَ داکتَر ءَ مَبَرِت کہ ٹَپّ سَکّ دَرد ءَ اَنت۔”
<سترُنگ><اِم>نِسار اَہمَد