دیوالانی ساہ بِڈَکّیت، دَروازَگ ھَیراں بِبیت
چۆش مَیا کہ مَرا مئے اِے تَہنائی تاواں بِبیت
سَبزێں چِراگے گیر بْیاریت کُنڈے ءَ یَکّ بِچکَندے
ھامۆشی ءِ دُوت بِبَنت ءُ دۆستانی دیواں بِبیت
لَبز ءِ بَزێں پۆشاک ءِ تَہا اَندێم نَبیت واہِشت ءِ بَدَن
ما وَت گێشێں جُست نَکُت چے بے سَہ دِلگراں بِبیت
سُہرێں شێنکاں رۆچ نَجَلّیت، سَبزێں شێنکاں سَردێں ماہ
مَن وَ جَلّاں بَلکێں بے مَن چَندے کَس وَیراں بِبیت
بْیا کہ ھما جاہ ءَ اوشتاتَگ، لُنٹاں بِچکَندانی سَپَر
یاکہ مَیا اِے دُنیا بَلکێں بے تئیگ ءَ وَشّاں بِبیت
زانت چۆ یار ءِ گَپّ نَگیش اَنت، آ شَوکێں اِستار وَت ءَ
کَمّ سینگاریت دانکہ گۆں مَن گَپّ جَنَگ اَرزاں بِبیت
وَشبُوے ءِ ساز بِمانیت داں ھَست اَنت اِے پَند زُبَیر
مَن چَہ جاہ ءَ پاد مَیایاں دِل دُنیا گَرداں بِبیت
<سترُنگ><اِم>زُبَیر کَمبَر