بْیا کُج ءَ ئے! مَنی سِچکانێں ھَیال ءِ اوتاگ
چَمّ کَدی بَنت تَئی اَرمانیێں دید ءِ مَہرَم
اَرس ءُ اولُمب بیت پہ مَن اِے زَہیرانی ھَتَم
مَن پہ چۆشی شَپی پاساں گۆں رَگاماں پێڈین*
رۆچاسانی ءُ رۆلَہ چۆ مَنی اَنگَرێں زِرد
مَن چۆ بے سار ءُ گَنۆک ءَ گۆں ھَیالاں جێڈین*
شَئے مُریدے مَن نَُن مَکَّہ ئے دَربَند ءِ کَپۆت
جام دُرُّک مَن نَُن، دْرین مَن ءَ ھال نَدَنت
مَست ءُ شَیدا اُں چۆ مَست ءَ بلے تَئی مَہزَب ءُ نَشک
ھانی ءُ سَمّی ءُ سَنگین ءِ وَڈ ءَ یات نَہ اَنت
تَو مَنی دۆشیێں واب ئے کہ شَمُشتَگ مَرچی
یا گُش ئے رَپتَگێں زِند ءِ تَو مَنی ھَمراہ ئے
یاکہ مِہر ءِ ھما گال ئے کہ دِل ءَ کئێت ءُ نَیَیت
چۆ سَمین ءِ گُلێں زێمِل ماں دُناں بے گْواہ ئے
شَپچِراگ ئے کہ شَپاں شَہم بِدَنت، گار بِبیت
چۆ گِرۆک ئے کہ نَزاناں ماں کُجام بَند ءَ اِنت
ھما نۆک ئے کہ دَر ءَ اِنت، وَدی بُوت نَکَنت
یا ھما بام کہ بے جَمبَر ءُ ھَور ءَ چێر اِنت
تَو چۆ مُلا ءِ یَکین ئے کہ نَز اَنت وَت چۆن اِنت
یاکہ ھاوَند ءِ وَدار ئے کہ کَدی پیلَو بیت
یاکہ بُت جۆڈ کَنۆک ءِ تَو گُش ئے رَپتَگێں یال،
یاکہ چۆ آشِک ءِ اَرس ئے کہ دِل ءَ بیت ءُ رِچیت
بْیا کُج ءَ ئے! مَنی آزُردێں نَسیب ءِ اوگواش
چَمّ کَدی بَنت تَئی اَرمانیێں دید ءِ مَہرَم
اَرس بَنت چَمّ چۆ ماں شانتَگێں ساہِگ ماں سَر ءَ
لَہڈ بیت دِل چۆ گَم ءِ گْواتگِرێں آسے ماں جَہاں
ھِچّ نَزاناں کہ کُج ءَ اِنت مَنی مِنزِل، مَنی راہ
گار ءُ گُمسار آں مَن اِمرۆز ءِ تَلارانی زِہاں
کَد پہ کَیپاں اِے گَماماچێں دِل ءَ سَہڈێناں
کَد اَمُلّاں مَن پہ تَئی تَنگَوێں دْرۆشُم بِزَراں
پہ ھُمارچَمّیێں کاڈانی شِپارێں بیکاں
پہ کِہێبلِہریێں شارانی اَبیرێں گْواتاں
بْیا کُج ءَ ئے! مَنی سِچکانێں ھَیال ءِ اوتاگ
بْیا کُج ءَ ئے! مَنی آزُردێں نَسیب ءِ اوگواش
چَمّ کَدی بَنت تَئی اَرمانیێں دید ءِ مَہرَم
<سترُنگ><اِم>۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
*پێڈاں
*جێڈاں
<سترُنگ><اِم>اَتا شاد