دَہر ءِ چَمّاں چَہ دَرامَد بیتَگ
ھَست کَسّے کہ نَپَہمیت شَہر ءَ
دِل پہ دێوانَگی اَندێم کُتَگ
نوں اِے رێٹائی نَشَہمیت شَہر ءَ
مَن کہ اِے دامُن ءِ تاراں چاراں
اَرس پۆلِنگے، جِتائی داگے
وَہدے اِستال شَپاں بُست کَن اَنت
دِل گُشیت وابے بُزُور ءُ دَر کَپ
جِند ءِ کۆتاہی ئے دَرد ءَ کَمّ کَن
رۆشِنێں دابے بُزُور ءُ دَر کَپ
چۆ مَبیت کہ وَت ءَ تَہنا بِکَن ئے
اَرس پۆلِنگے، جِتائی داگے
لَہتے مُرگ اَنت کہ کَتار اَنت سُہبا
مۆتک ءُ زارانی تَہا سَوت گُش اَنت
بے زُبانی ئے مَلاراں نۆش اَنت
چَمّاں چار اَنت ءُ دِل ءَ سَوت گُش اَنت
تَو اوں بے وانکی ءِ دَنزاں پَہک کَن
اَرس پۆلِنگے، جِتائی داگے
گْوات ءِ ھَمراہ، چِراگاں دَز گِر
گُنگێں اَکسانی تَواراں بَر گۆں
اَندَر ءِ مۆسُم ءِ رِپک ءَ دَر بَر
باتِن ءِ سَبر ءُ کَراراں بَر گۆں
چۆ مَبیت رَند ءَ پَشۆماں بِب ئے
اَرس پۆلِنگے، جِتائی داگے
ھَردێں چَہ ساہِگ ءَ پێسَر کا ئے
شَہر ءِ دیوالاں وَتی بُرز بِکَن
تَو مَنی باتِن ءِ دْرَچکێں بالاد
سَبزُکێں ٹالاں وَتی بُرز بِکَن
چۆ مَبیت جِند ءِ دِل ءَ گراں بِب ئے
اَرس پۆلِنگے، جِتائی داگے
وَہد ءِ ھاکۆٹ ءَ کہ ھَرچی گار اِنت
کَسّ وَتی کَندَگاں دَر گێتک نَکَنت
اَنچێں ھامۆشیے چَمّاں وَپتَگ
دِل وَتی گْرێوَگاں دَر گێتک نَکَنت
چَنڈ تَہنائی ئے دَنزاں اَرماں
اَرس پۆلِنگے، جِتائی داگے
<سترُنگ><اِم>ھالِک اَرماں