دیدَگاں دۆست ءِ ھُمارێناں، مَنی تاہیر بُرت
سْیَہبَزێں بیکاں شِپارێناں، مَنی تاہیر بُرت
گْوَر پہ گْوَر ھَمجُتکیا ماں نَرمَگێں بے ٹ ءِ سَر ءَ
رُستَگێں جاڈاں، اَنارێناں مَنی تاہیر بُرت
پَییَکا نَیل اَنت مَن ءَ تْرانَگ ماں کاشێں کُڈُّک ءَ
دَرد ءُ رَنجاں بے شُمارێناں مَنی تاہیر بُرت
لۆٹِتُن گامے بْیایاں پہ تَو، پاداں دات جَواب
چارَگاں تَئی گِلَّدارێناں مَنی تاہیر بُرت
نئے مَن کُت گْرانێں گُناہے، نئے چُشێں کَرے رَدێں
کار ءُ کِرداں ھۆش ءُ سارێناں مَنی تاہیر بُرت
تَلوَساں مَن، تَلوَس اَنت واہَگ دِل ءِ ھَجگێں مَنی
اِے شَپاں، بے تَو، تَہارێناں مَنی تاہیر بُرت
نِزِّ مَن سالے گُش ئے ساہِر ھَمُک نی ساہَتے،
وَشّی ءِ رۆچاں، دو، چارێناں مَنی تاہیر بُرت
<سترُنگ><اِم>مُراد ساہِر