بِشکُن مَنی پِریاتاں پُنُّو!
پَرچی شُت ئے گۆں بْراتاں
بۆشتِت بَرِت گۆں اِے بے کَسارا
رَندِ شُما کئے ھَست اِنت مَن ءَ را
مَن تَئی کُرباں باتاں پُنُّو!
پَرچی شُت ئے گۆں بْراتاں
پَرچی شُما چۆ تێز رَوان اِت
رَند ءَ کَسے پێداک اِنت نَزانِت
مَہری شُمئے لَنگ باتاں* پُنُّو!
پَرچی شُت ئے گۆں بْراتاں
دَر پہ دَر آں مَن کۆہ ءُ اَگاراں
دِلمۆش کَنان آں ڈَنگَر ءُ داراں
گار اِے سارباں باتاں پُنُّو
پَرچی شُت ئے گۆں بْراتاں
جِند مَنی تَہنا تُنّ ءِ ھَلاہۆش
کَسّ دِل ءِ دۆست ءَ گۆں نَکَنت چۆش!
سَر کُتَگ نی سْیَہگواتاں پُنُّو!
پَرچی شُت ئے گۆں بْراتاں
بَہت دُچار کَن گۆں مَن بَلۆچاں
شات ءُ گَلانی پێسَری رۆچاں
یَلَہ دات مَن ءَ شَرزاتاں پُنُّو!
پَرچی شُت ئے گۆں بْراتاں
… … … …
*لَنگ باتاں = بات اَنت
<سترُنگ><اِم>مُراد ساہِر