?

مَن ءَ شَمۆش!!
مَن مِہر ءِ بے مِہرێں ساہِگ آں!
مَنی مِہر، مِہرانی مَندَر ءَ
ھَمُک مِہری بانڈُم ءَ
مِہر ءِ ھُدا لێکیت!
مَن چَہ کَرناں بے مِہرێں رَہگوَز ءَ
پَد گِراں، سَر جَناں، تَلوَساں،
دێم پہ بے نامێں مِہری مِنزِلے، پہ تَو رَسِتَگاں!
ءُ تَئی مِہر؟
بے مِہرێں وابے!
مِہر مَنی، مِہر ءِ شَپ ءِ اِستار ءِ مِرمِرانکێں بْرَمش!
تَئی تْرانَگ، تَئی زَہیر، تَئی مۆلُم، تَئی گَم، تَئی وَپا
کُلّ بے مِہری ئے "مَندر" اَنت
ءُ مَن اِے دُرس
نێستی ئے مِہر ءِ مانِش ءَ زِندَگێں مِہرَێ ئِے کَش ءَ واپێنتَگ اَنت!
(پہ کَڈَّنێں مِہرانی بے مِہرێں اوست ءَ )
ءُ مَن ءَ مِہر اِنت
گۆں وَتی مِہر ءِ بے مِہرێں تَہنائی ئے مِہر ءَ !
ھما کہ مَنی زِند ءِ اَوَلی ءُ آسَری مِہر اِنت
ءُ مِہرنَدیستێں مِہرے!
مَن مِہر ءَ چۆن شَمۆشاں؟
کہ مَنی بُنگێج مِہر ءُ آسَر اِنت مِہر!
مَن ءَ شَمۆش!
اَنچۆش کہ "مِہر" مِہر ءَ شَمۆشیت
بے مِہر بے مِہرا
مَن مِہر ءِ اَکسگِر ئے مِہرانی گُڈّی مِہ راں
گۆں ناسَرجَمێم مِہرانی اَکسے ءَ
کہ آئی ءِ مانا نێستی ءُ ناُمێتیا اَبَید
دِگِہ ھِچّ بُوت نَکَنت
مَن ءَ شَمۆش!!

<سترُنگ><اِم>مُبارِک کازی

دَسَمبَر-1984، شال