مِہر ءِ پِڈ ءَ کہ ھۆنێں اَرساں چارَگ لۆٹ ئے بْیا
رۆکێں دِلانی آسێں دَرداں مارَگ لۆٹ ئے بْیا
مئے یاتانی بانۆر ءَ سینگارَگ لۆٹ ئے بْیا
دَرد ءِ رَگام ءَ ، زِرد ءِ ڈَگار ءَ گْوارَگ لۆٹ ئے بْیا
مَرگ ءِ سَگار ءِ زِہ کہ مَن ءَ را کُشت نَکَنت جَزم آں
زِند ءِ مَزارێں دَست ءِ سِلاہ ءَ دارَگ لۆٹ ئے بْیا
کْوَہنێں دۆداں چُنت دِلانی مِہر کُت اَنت بے گْواہ
پہ مئے جَہان ءَ نۆکێں رَسمے آرَگ لۆٹ ئے بْیا
تُرس ءُ گُناہ ءِ، لَجّ ءُ مَیار ءِ اُزر کُجام ڈَکّ ءَ
مَن کہ تَرا ءُ تَو کہ مَن ءَ را بارَگ لۆٹ ئے بْیا
<سترُنگ><اِم>مُبارِک کازی
اَکتۆبَر-1984، شال