ساچانێں سَباہے اَت۔ وَشّێں کَوشے کَشَّگ ءَ اَت۔ مَن لۆگ ءَ نِشتَگ ءُ ھَیال کَنَگ ءَ اَتاں کہ مۆسُم وَشّ اِنت، مَرچی رَواں دێم پہ سَیل ءُ سَوادے ءَ۔ ھَمے وَہد ءَ گْوَنڈُوے تَچانا اَتک ءُ مَن ءَ ھال ئِے دات کہ تَرا لال بَکش ءِ دُکّان ءَ لۆٹَگ ءَ اَنت۔ مَن دِل ءَ گُشت پِکنِک ءِ بُو اِنت۔
کَمُّکے ءَ رَند وَہدے مَن لال بَکش آزات ءِ دَرمانجاہ ءَ سَر بیتاں داں ھَو، ٹۆلی ساڈی اَت۔ مئے پِکنِک ءِ ٹۆلی ءِ ھَپت مُکیمی باسک اَت اَنت۔ لال بَکش آزات، گُلام، سُوپی نِزَر، ماشٹَر سَکیداد، مَہمَد جَگَر، ماشٹَر ھالِد ءُ مُلا مُراد۔ بَرے بَرے کہ مَن چَہ شَہر ءَ لۆگ ءَ اَتکاں، گُڈا مَن ھَم گۆن اَتاں۔
“بْیا اَڈ ءِ! تَو چَہ لۆگ ءَ دَر نَیا ئے۔ گُش ئے ھَیکانی سَر ءَ ئے۔” گۆں مَنی گِندَگ ءَ ماشٹَر ھالِدا دَپ پَلَّگۆشت۔ مَنی پَسَّو ءَ پێش ماشٹَر سَکیداد ءَ گُشت، “ھَیکانی سَر ءَ نَہ اِنت، نِکێنک ءِ سَر ءَ اِنت!”
دْرُستاں کُوکّار دات۔ وَہدے کَندَگ ءُ کْریشتَگاں تَم کُت، گُڈا مُلا مُراد ءَ جَمبَرانی نێمَگ ءَ اِشارَہ کُت ءُ پَتوا دات، “پِکنِکی مۆسُمے!”
دێر نَگوَست ما پَرپَٹاں دُپُشتَگ بُوت ءُ بُرزاد بیتێں۔ مَرچی پِکنِک مُلا مُراد ءَ داتَگَت ءُ آئی ءِ پَرماِش ءَ نۆکێں جاہے ءَ شُتێں۔ پِکنِک ءِ اِے نۆکێں جاگَہ مَچکِدَگے اَت کہ کَورے ءِ کَنِکّ ءَ اَت۔ دُمی نێمَگ ءَ پْراہێں گِتانے اَت۔ کَور، مَچکِدَگ ءُ گِتان ءِ گۆریچانی نێمَگ ءَ کۆہ اَت۔ جاگَہ ءِ زێد وَشّ اَت۔
جَمبَر سَر ءَ اَت اَنت، پَمِشکا گۆں پِکنِک ءِ جاگَہ ءَ سَر بَیَگ ءَ ھَرکَس کارے ءَ گێڈ بُوت۔ لال بَکش ءَ شیرچاہے پِر کُت۔ سَکیداد ءَ تَپَرے بَڈّ ءَ کُت ءُ دار ئے چِنَگ ءَ کَور ءَ اێر کَپت۔ سُوپی نِزَر وَتی ٹُوٹُوا سَر ءُ پُٹ بُوت کہ رَواں مُرگ ءِ شِکار ءَ ۔ مَہمَد جَگَر پُرانیگ ءِ آرت ءِ تَرّ کَنَگ ءَ لَگِّت۔ ماشٹَر ھالِد پہ پُرانیگ ءِ پَچَگ ءَ پُگُنز ءِ شۆہاز ءَ گێڈ پہ گێڈ بُوت۔ گُلام کہ مئے کَنوَری اَت، گۆشتاں پُلّ پُلّ ءَ بُرَّگ ءَ لَگِّت۔ مُلا مُراد ءَ مۆسُم ءِ “چارَگ” کُت ءُ چَہ لانک ءَ بۆتَلے کَشِّت۔
مَنی وَنڈ ءَ سَلاد تْرُنسَگ ءِ کار کَپت بلے اَنگَت پہ سَلاد ءَ وَہد ھَست اَت۔ مَن سَواس پاد ءَ کُت اَنت کہ رَواں کَش ءُ گْوَر ءَ سَیلے کَنان ءُ نۆکێں جاگَہ ءَ چاراں۔
ماشٹَر ھالِدا مَن ءَ رَوَگ ءَ دیست۔ کُوکّار ئِے کُت، “اود ءَ کہ کار اِنت، مارا چِہ کار اِنت۔”
دُزّ ءِ دِل جَنت پَمِشکا چَہ مَن پێسَر مُلا مُراد ءَ چَکّ جَت ءُ گُشت، “بَچَکّ، بَلکێں تَو مَنی گۆشاں جَنَگ ءَ ئے؟”
ھالِد نَگێگ بُوت۔ گُشت ئِے، “اِنّاں مُلا! تَرا نَگُشاں، بُنڈُک ءَ گُشاں۔”
“بُنڈُک ءَ ھَرچی گُش ئے بُگُش بلے “بُنڈ ءِ” نام ءَ نَگِر ئے۔”
سُوپی ءَ پُرّاپُرّێں مُلا مُراد ءِ نێمَگ ءَ چارِت۔ دْرُستاں پْریشت کُت کَندَگ۔ مُلا کہ اَوَلی پَئێگ ءَ یَتِّنگ کَنَگ ءَ اَت، شَراباں تْرُجِّت۔ کَندَگ ءَ وار نَدات ءُ شَراب ئِے چَہ پۆنز ءَ دَر اَتک اَنت۔
ھَمے کَندَگ ءُ کُوکّاراں چاہ جاڈی بُوت۔ لال بَکش ءَ پالات ءُ مارا دَیاں کُت۔ مَن کۆپے چاہ وارت ءُ کَور ءَ بُرزاد بیتاں۔
اِے کَور چَہ گَزّ، پیشّ ءُ پِنسێں کُنِر ءُ جَور ءَ پُرّ اَت۔ مَن داں دێراں کَور ءَ تَرِّتاں۔ کُنِر چِت، کیلَّڈ گْوَتک ءُ وارت۔ داں کَمُّکے ءَ کَور ءِ اِے چۆٹ ءُ پَر ءَ چۆٹا تَرَّگ ءَ رَند کۆہے ءِ ٹُلّ ءَ سَر کَپت ءُ نِشتاں۔ مۆسُم سَکّ وَشّ اَت۔ کَوشے بُتکَگَت کہ دِل ئِے ماں رُپت۔ چِدا گْوَہرَگ داں کانیگ تێوَگێں نِگوَر دَر ءَ اَت۔ داں شَرّێں دَمانے مَن ھَمِد ءَ نِشت ءُ نِدارَگ چارِت۔ پَدا اێر اَتکان ءُ دێم پہ بُنجُل ءَ رَہادَگ بیتاں۔
وَرَگ تَیار اَت۔ مَن کارچ دَست ءَ کُت کہ سَلاداں تْرُنساں۔ گُلام ءَ گُشت، “آ دێری مُلا ءَ اَڈّ کُت اَنت۔”
مَن گُشت، “تَو مُلا مَپَرماتێں۔”
گُشت ئِے، “مَن نَپَرمات۔ دو پَئێگ ءَ رَند وَت گُشت ئِے -ھُشکێں نِندَگ ءَ ناہ ءِ گَڈَّگ کَنَگ - ءُ شُرُو بُوت سَلادانی تْرُنسَگ ءَ۔”
وَرَگ جاڈی اَت اَنت بلے سُوپی نِزَر اَنگَت گار اَت۔ کَمُّکے ءَ رَند سُوپی شُلامَگ شُلامَگ ءَ اَتک۔ شِکار ئِے دَست نَکَپتَگَت۔ مُلا نِشَہ اَت۔ دێم ئِے گۆں سُوپی ءَ کُت۔ “سُوپی! اِے بالی کَپۆت اَنت، لۆگی کَپۆت نَہ اَنت کہ ھَر وَہد ءَ دِل لۆٹیت، شِکار کن ئے۔”
دْرُستاں کُوکّار دات ءُ کَندِت، چی ءَ کہ سُوپی ءِ لۆگی ءِ نام کَپۆت اَت۔ یَکّے شِکار ءِ دَست نَکَپَگ، دُمی کَلاگ ءُ کَندَگ۔ سُوپی کُپِّت ءُ نِشت۔
کَمُّکے ءَ رَند گُلام ءَ جار جَت بْیاِت وَرَگ ءَ بْوَرِت۔ ما دْرُست نِشتێں۔ وَرَگ سَکّ وَشّ اَت اَنت۔ مُلا گُٹّ ءُ گُلاٹ ءَ اَت۔ گُشت ئِے، “گُلام! تَو جَنێںے بیتێن ءِ مَن تَرا گِپتَگَت۔ چُشێں وَشّێں وَرَگ ءِ گْرادَگ!”
سُوپی ءَ بێر گِرَگ ءِ مۆہ رَست۔ دَرّاێنت ئِے، “اَنچۆ بِگِر ئِے مُلا! پہ تَو رَوا اِنت۔” دْرُستاں کَندِت۔
گُلام ءَ گُشت، “سُوپی! دِگِہ پَرے مَن وَرَگاں سۆچاک کَناں۔”
سُوپی ءَ سۆچاکی کُنَّت اَت۔ وَہدے وارت ئِے، سَجَّہێں رۆچ ءَ ھِکِّت ئِے۔
وَرَگ ءَ رَند پَتّائی شُرُو بُوت۔ مُلا زَبر اَت، مارا بُرت ئِے۔ وَہدے ما پَتّائی ءَ دَم بُرت گُڈا مَہمَد جَگَر ءَ ، بَرکَت بَلّ والا ئے گێگاں گِپت اَنت ءُ مارا کَندێنت۔ وَہدے بَرکَت ءِ گَپّ ھَلِّت اَنت، ناِب ءُ نازُمانی بَڈّ ءَ کَپت۔ اِے رۆچی مَہمَد ءَ ماشٹَر ھالِد وار نَدات کہ ناکُو مُوسّا ءُ میر مَہمَد اَلی ءِ کِسَّہاں بْیاریت۔
جَمبَر بَز تَرّان اَت۔ رۆزَرد ءَ ھَور ءَ اێر دات۔ ما گُشاد گُشاد ءَ ساماں چِت اَنت ءُ دێم پہ لۆگاں رَہادَگ بیتێں۔ دانکہ مێتَگ ءَ رَسِتێں، ھَور ءَ مارا اَلکاپ ءَ میسّێنت۔
…………۔۔
کَماش ءَ رۆدَپتَر بَند کُت، کُرشی ءَ تِکَہ دات ءُ چَمّ نَزّ کُت اَنت۔ ھَر وَہد ءَ کہ جَمبَر ماں شان اَنت ءُ مۆسُم ساچاں بیت، آ دَرانڈێہێں کَماش وَتی وَرنائی ءِ رۆدَپتَر ءَ پَچ کَنت ءُ اَنچێں رۆچے ءِ سَرگوَستا وانیت کہ ھَور ءُ جَمبَری بیتَگ ءُ آ گۆں وَتی مێتَگ ءِ سَنگَتاں پِکنِکے ءَ شُتَگ۔
<سترُنگ><اِم>ناگُماں