اِے کۆہ مِچاچ اَنت دَشتانی، بازار تَیاب اَنت گْیابان ءِ
ھَورے ءِ نِوان ءَ سَبزێنیت دِل دْراہێں واباں گْیابان ءِ
پُرکَیپێں زَہیرے لُنٹ گَسیت، بُروانُک دَنت اِنت بے مَیلا
بے رَنگ نِگاہے گیشێنیت بَسّ پێچ ءُ تاباں گْیابان ءِ
اَرواہے سَہاریت مِستاگاں باندات ءِ بُزِرگێں پَہنات ءَ
بِچکَند تْرَہێن اَنت رَنجاں تَئی، سَرّێچ اَنت اَزاباں گْیابان ءِ
بْیا بْیا کہ زَمانَگ پادِ شِپاد تَئی شۆہاز ءَ پَد گَردان اِنت
بے مُلّێں ھُمارے آ لَہڈی چَہ بَنگ ءُ شَراباں گْیابان ءِ
سِنگانی بَشارَت پۆشاک اَنت اُزرانی ھُدابُندێں دیدۆک
مَہکانجَلَشکێں کانچبَدَن پَہرێز گُلاباں گْیابان ءِ
باہَند پَناہے اِستُوناں، ھَنکێں وَپایے باڈا ایت
مۆلُم داں وَت ءَ ھینار مَکَنت دِل گْیاباں، گْیاباں، گْیابان ءِ
<سترُنگ><اِم>مۆلُم چِراگ