اِمرۆز وَتی مَہتَلێں گامانی سَواد ءَ
پَش(ت) کَپتَگێں بِچکَنداں بِریاں کَناں کَنت
وَیرانیاں شِنگێنیت پَدا چَمّ ءِ سَرُون ءَ
ما گُنگ بِبێں، اَرس وَرێں،
جاک جَنێں، دَرد
ما دْرُست گَیابانی مُساپِرچَکێں شَبجَت
ما دْرُست وَتی دۆزَہێں پاسانی سِپاہیگ
ما دْرُست تَئی وَژبۆێں مِہرانی وَداریگ
ما دْرُست گَنۆک یَووَڈا، یَووَڈا رێٹا
رۆزَردمُجێں گْوات ءِ تَلَب مَیل نَدار اَنت
بے مَتلَب ءَ آگاہی ئے نیمۆناں سَر ءُ چێر
بے کَیپێں زَمانَگ وَتی ھۆشام ءِ گَل ءَ اِنت
اِے تُنّ مئے کۆپَگ ءِ کَبرانی مَیار اِنت
ھَنکێنزَدێں نَوبَتاں اوماں وَدار اِنت
اِہسان ئے وَپایانی مُہُبَّت مئے سَر ءَ اَنت
ڈُکّالُک ءِ وَہمانی ھَزانَگتَبێں دُنیا
پَش(ت) کَپتَگ تُشے زِندَگی اَنگَت!
تَو پَدا بْیا
کامُو ءِ نَمیرانێں نَمیران ءِ زَہیراں
لاچارێں کَرارے ءِ وابانی بَہاراں
دَر گێج، رَگام ءِ پَدا وَژزێمِرێں سَہتاں
سَیلان ءَ بِکَندێں،
پَش(ت) کَپتَگ تُشے زِندَگی اَنگَت،
تَو پَدا بْیا
پێرۆز ءِ ھَمُک شیرکِنێں ٹَپّاں کَنێں دَرماں
جَمی ءَ وَتی راستێں نِگاہاں کَنێں گَردێں
اَبدالێں سَمیر اَنت ءُ شَپہاجَتێں مَنزُور
شیشَگَّمێں جُمَّہ ئے پِریات بُلۆراں
شَیہَکّ ئے مَزَنتَوکَلێں ھاجیێں کَلاتاں
گالِبوَڈێں مَولانَگ ءُ مَستانَہێں مَرداں
کُلّ ھَمدِلێں یاران ءُ رَنگینێں گُلاباں
داکتَرچَکێں دێوانَگیاں کۆپَگاں دْرَنجێں
چَمرۆکێں وَتی سُنٹُک ءَ پَہرێزێں زَیپ اِنت
نۆتَکزَدێں واباں پَدا پۆدێں کَنێں وَرنا
نۆدانتَبێں تِبلێں بُزِرگانی دَیار ءَ
اِمداد ئے ھُداچاڈێں مِہرانی بَہِشت ءَ
پَش(ت) کَپتَگ تُشے زِندَگی اَنگَت،
تَو پَدا بْیا!
وابانی پَد ءُ پێش ءَ سَپَر آگَہ اِنت اَنگَت
گیمُرتَگ اَنت سَنگَت…۔
<سترُنگ><اِم>مۆلُم چِراگ