مَن ءَ را یات اِنت اَنگَتا
تَئی شِپارێں مَہپَرانی مِسکبُوێں ساہِگ ءَ
تَئی شَہدمَنتَگێں اَنارکانی بۆسَگ ءِ سَہَر!!
مَن ءَ را یات اِنت اَنگَتا
تَئی شَرابشانێں دیدَگانی کَیپ ءُ نۆش
مَن پہ سَد مُراد تِنگِت اَنت، دیست واہَگ ءِ اَسَر!!
مَن ءَ را یات اِنت اَنگَتا
تَئی گُلابدرۆشُمێں تَنَکلُنٹیا
مَنی گَمانی سْیاہشَپ کُت اَنت چۆ جَنَّت ءِ ھَزارنازێں راہسَر!!
مَن ءَ را یات اِنت اَنگَتا
تَئی چَندَنێں بَدَن چۆ نَرم آبرێشُم ءَ گِرۆک ءِ شَہم ءِ دَروَر اَت!!
مَن دانکہ مُدَّتے تَئی زَباد ءُ مِہلَبێں بَدَن وَت ءَ گۆں کُرت سَر ماں سَر!!
سَتَر کہ دَور گْوَستَگێں پَدا نَبَنت پہ مَن ءَ
بلے مَن اَنگَتا بَرے
تَئی کہ تْرانَگ ءَ کَپاں
گَمانی داگ نۆک بَنت
دِل ءَ چِراگ رۆک بَنت
<سترُنگ><اِم>مُبارِک کازی
مَئی-1982، مَچّ