نئے شَہربانُو، نئے تَو مئے گُلی
گیتانجَلی، اُو گیتانجَلی
وَتی دۆد ءُ رَسم ءُ رَواجاں شَمۆش
اِے کَلّیگ ءُ مَشک ءُ نِپاداں شَمۆش
اِے شێکِن ءُ پَتکێنک، اِے کۆلێں ناں
اِے گْوانزَگ ءُ کاپَر، اِے پَلّ ءُ باں
کَہیر ءُ کُنِر تَئی، گَزّ ءُ کَلێر
اِے گۆک ءُ نَنگار، چِنالانی چێر
تَئی کار ءَ نَیا اَنت کہ جِندَئێگ اَنت تَئی
بُرَو دیرێں مُلکاں، تَو دِگِر ئے بِبی
زَہیرۆک ءُ نازێنک ءُ سَوتاں شَمۆش
گَزَل داِم پِر بَند، تَو ڈَیک مَجَن
پہ دۆستاں دِلی، تَو ھایکُو بِبَند
وَتی گال ءُ لَبزاں، زُبان ءَ شَمۆش
وَتی جِند ءِ جان ءَ چَہ پَشک ءَ لَگۆش
تَو تَلوَس پہ گالِب، پہ میر ءَ بِزَر
بِکَن لَیب ءُ گْوازی ءُ مُلک ءَ بِتَرّ
بالاچ شَمۆشتَگ، شَمۆش چاکَر ءَ
مَکَن یات گْوَہرام ءَ ، تَو بِلّ کَمبَر ءَ
تَو مُلا شَمُشتَگ، تَو پازُل شَمُشت
تَو سیمُک شَمُشتَگ، تَو ماہَل شَمُشت
تَو ھانی ءُ شَئے ءَ لێک ئے گَنۆک
دُنیا ءَ نام اِنت تَئی بْراتکُشۆک
گُش اَنت بۆلی اگں وَشّ اِنت، جِند ءِ بَدێں
وَتی مُلک ءِ ھَرچ کَہن ءُ جُو اِنت تَئی
بالاچ تئیگ اِنت ءُ دۆدا تَئی
بیبَگر تئیگ اِنت ءُ گْراناز تَئی
تئیگ اِنت ھَمید ءُ اُمَرجاں تَئی
گَزابێک ءُ گَزّی ءُ دِلجاں تَئی
نۆرۆز تئیگ اِنت، نَسیر ھاں تَئی
کَلات میر ءِ تَئی ءُ مُلتاں تَئی
سَتَر ھُشک ءُ وار اِنت زِمین اِنت تَئی
ھاراں تئیگ اِنت ءُ سیستاں تَئی
گَل ءَ دَشت ءُ مَند ءَ ، تَو کێچ ءَ گَل ءَ
کہ جِند ءَ تَئی بْراہیت سَر ءِ تَئی کُلاہ
پہ تَو سَنج ءُ بُنجاہ، تَئی تێس ءُ بْرێس
بَمبُور ءُ سُہرکۆہ تَئی ھَست ءُ نێست
جِند ءِ تَئی چاگِرد، تَئی جَنَّت اِنت
کَوش تَئی سَباہ ءِ، تَئی رۆچ بَرکَتێں
اِے مَہلُوک ءُ مَردُم، بے ھِرکَتێں
پَکیر ءُ گَدائیں، دْراہ بے وَتێں
وَتی بۆلیاں مَن چِتَور یَل کَناں
مَن بَکَّل ءُ گَور ءِ کہ رَند ءَ تَچاں
نئے شَہربانُو، نئے تَو مئے گُلی
گیتانجَلی، اُو گیتانجَلی
وَتی لَبز ءِ شَیدا، زُبان ءِ وَتی
وَتی جِند ءِ گَپّ ءُ بَیان ءِ وَتی
مَن گێگاناں بِلّ ئِے کَناں پازُل ءِ
مَن بُہیر ئے گال آں، سُکَن کاسُم ئے
مَن دَر بُرتَگ پَیز ءُ مَن وَنتَگ پَراز
مَن آں جۆش ءُ ٹێگۆر ءُ جِبران ئے راز
میرواڈی دۆست اِنت، جَوانسال دۆست
نَسیر نَپت ءُ بیرێں وَتی گال دۆست
اَبابَگر ءُ اِزَّت، مَن ءَ اَنک ءَ دۆست
سَیَد دۆست، تَچکێں وَتی راہبَند
مَن ءَ دۆست وَتی رَسم، مَن ءَ دۆست رَواج
وَتی کاڈ گَزالێں، دِل ءِ تَہت ءُ تاج
مَن شَیدا زُبان ءِ، مَن لَبز ءِ ھُدۆک
وَتی چَمّ دۆست اَنت، وَتی چَمّ ءِ رۆک
مَن ءَ تَو شِگاناں مَجَن دِلبَر ءِ
پہ مَن شَیر وَشّ اَنت گُلێں ساہِر ئے
وَتی لَبز ءِ بَندیگ، زُبان ءِ وَتی
مَن ناِلمێں جِند ءِ، ھَیال آں وَتی
وَتی جِند ءِ چاگِرد، مَوال آں وَتی
مَن ءَ چَہ ھَیالاں مَنی پَچ مَگِر
مَن ءَ رۆچ ءَ مَڈۆبار، شَپ ءَ سَر مَگِر
زُباں دُربَیان اِنت بَلۆچی مَنی
مَنی باندات ھَمێش ءُ مَرۆچی مَنی
مَنی لَبز ءُ گُپتار، بَیان اِنت ھَمێش
پہ مَن گَنج ءُ گَوہَر، پہ مَن کَمّ ءُ گێش
زُباں زِندَگ بات ءُ سَلامَت بِبات
مَیاریگ بات شۆہاز، مَلامَت بِبات
نئے شَہربانُو، نہ تَو مئے گُلی
گیتانجَلی، اُو گیتانجَلی
<سترُنگ><اِم>گُلام ھُسَین شۆہاز