چۆن بِسَہڈێناں دِل ءَ ؟
چۆن بِسَہڈێناں دِل ءَ ؟
کہ دِل ءَ آسے بُن اِنت
گَم ءِ جَمبَر پہ دْرَدی
سَہت ءُ دَماں اێر دَ اَنت
تْرُنگَلێں اَرس شَل اَنت
گْوات ھَم کَشّیت اَگاں
آزَگێں ٹَپّ کُد اَنت
کہ دِل ءَ آسے بُن اِنت!
ءُ دِل ءِ آس چَہ اَرسانی
شَلاں سارت نَبیت
پہ مَن اِمرۆز تَہار!
راہ مَنی دَنز ءُ گُبار!!
چَہ مَن ءَ ھَرکَسّ شِزار
کہ گَم ءُ رَنج ءِ تَہاری
چَہ دِل ءِ آس ءَ نَرَوت
کہ دِل ءِ آس تَئی مِہر ءُ وَپا ءِ
داد اِنت!!
اُو مَنی ساہ ءِ بَدَل
پہ تَئی ھاتِر ءَ مَن بیتَگاں دَردانی مَیار
بلے اَنگَت چَہ تَئی
مِہر ءَ پِرامۆش نَہ آں
مَن وَتی زِند ءِ
ھَمُک بَہر ءَ تَرا یات کَناں
دِل ءَ شات کَناں
کہ مَنی ساہ تَو ئے
کہ مَنی جاں تَو ئے
کہ مَنی دین ءُ مَنی مَہزَب
ءُ اێمِن تَو ئے
بلے تَئی اوست ءَ "وَتی"
چۆن بِسَہڈێناں دِل ءَ
چۆن بِسَہڈێناں دِل ءَ
<سترُنگ><اِم>مُبارِک کازی