شِریشّ ئے بَزێں ساہِگ ءَ گۆرپات ءِ سَر ءَ نِشتَگێں جَنێں جێڈَگ ءَ اِنت۔
شِریشّ ئے پُلّانی وَشّێں بُو ماں گْوات ءَ آتار اِنت۔ بُرز ءَ شاہے ءِ سَر ءَ کُلیے نِشتَگ ءُ چُلی چُلی کَنَگ ءَ اِنت۔ چَہ دُورا ٹِکٹِر ءِ ٹَیپا بَلۆچی سَوتے ءِ تَوار بازار ءَ تالان اِنت۔ کُچِکّے چَہ شِریشّ ئے ساہِگ ءَ کَمّے پَسِّند کاپَر ءِ پْرُشتَگێں مِنُکّ ئے بُن ءَ وَپتَگ ءُ لِٹِّک ءَ سُرێنَگ ءَ اِنت۔ بے کَمپانێں لۆگ اَنت۔ لۆگانی میان ءَ چێرکِشکے گْوَزیت ءُ دێم پہ بازار ءِ نێمَگ ءَ رَوت۔
نۆکبَرۆتێں وَرنایے چَمے چێر کِشک ءَ گْوَزان ءُ چَہ شِریشّ ئے ساہِگ ءَ کَمّے ھما دێم اِنت۔ جَنێن ءِ دێم گۆں نۆکبَرۆتێں بَچَکّ ءَ اِنت۔ بَچَکّ سُست سُستا رَوَگ ءَ اِنت، جَنێں آئی ءَ اَنچۆ رۆک رۆک ءَ چارَگ ءَ اِنت گُش ئے آئی ءِ گامگێجاں ھِساب کَنَگ ءَ اِنت۔
آ جێڈَگ ءَ اِنت کہ مَنی زِندَگی چۆ ھَمے بَچَکّ ءِ سُستێں گامگێجان اِنت، نا زُوتّ مِنزِلے ءَ سَرَ بیت ءُ نئے پُشت ءَ واتَرّ کَنت۔
دۆشی آئی ءَ اَجَبێں وابے دیستَگَت۔ چونایا آئی ءَ ھَر وَہد ءَ واب دیستَگَت تَ آئی ءِ واب نێمبُندَگ بُوتَگَت اَنت ، ھَمے کہ آ وابانی آسَر ءَ رَسَگی بُوتَگَت تَ آ چَہ واب ءَ گُڈِتَگَت۔ دۆشیگێں واب پَرایا یَکّ نێمَگے تَکانسَر کَنۆکێں وابے اَت ءُ یَکّ نێمَگے پُرتاہیر اَت۔ ھَمے واب ءِ آسَر اَت کہ پَرایا جێڈَگانی دَرے بُتکَگَت ئِے۔ چِد ءُ پێش آئی ءَ نا جێڈَگ زانتَگَت ءُ نئے آئی ءَ پہ جێڈَگ ءُ پِگر کَنَگ ءَ مُہ رَسِتَگَت۔ آئی ءِ زِندَگی بَسّ چَہ وَتی کَلَنڈێں بان ءَ بِندات بُوت ءُ لۆگ ءِ پێشگاہ ئے چَپّ ءُ چاگِرد ءَ پِر تَرّانا داں پَدا کَلَنڈێں بان ءَ شَپ کَپت۔
آ جێڈاگا اَت کہ مَردُم ءِ واب پَرچا نێمبُندَگ بَنت؟ مَردُم ءِ واہِشت ءُ تَماہ پَرچا سَرجَم بُوَگ ءَ پێسَر ساہ دَ اَنت؟ مَردُم پَرچا وَتی واہَگاں دَستِ وَت کَلّ ءُ کَسارَت کَن اَنت؟ مَردُم پَرچا وَتی رُژنائیں زِندَگی ءَ تَہاریانی کۆرچات ءَ چَگَل دَ اَنت؟ زِندَگی ءِ تَہارێں کۆرچات ءَ کَپتَگێں مَردُم پَرچا پہ دَر آیَگ ءَ سَر ءُ پاد نَجَن اَنت؟ مَردُم پَرچا پہ دِگِر ئے زِندَگی ءِ تێلانک دَیَگ ءَ وَتی جِند ءِ لۆٹ ءُ واہِشتاں زِندَہ دَرگۆر کَن اَنت؟
آ جێڈَگ ءَ اَت کہ مَن پَرچا زِندَگ آں؟
پہ وَت ءَ یا پہ دِگِر ئے رۆچانی گْوازێنَگ ءَ؟ آ جێڈَگ ءَ اَت کہ بے زُبانێں مَردُم پَرچا زُباں نَرۆدێن اَنت؟
آ جێڈَگ ءَ اَت کہ مَردُم پَرچا گُنگێں زُبانانی اَندَر ءَ چێر تَرِّتَگێں اُپّاراں نَزان اَنت؟
نۆکبَرۆتێں وَرنا گِسَر کَپتَگَت ءُ آئی ءِ پادانی پَد پَشت کَپتَگَت اَنت بلے آئی ءِ چَمّ اَنگَت ھما کِشک ءَ سَکّ اَت اَنت کہ نۆکبَرۆتێں وَرنا ءِ پادانی پَد کَپتَگَت اَنت۔ کُلی ءَ چَہ شِریشّ ئے شاہ ءَ بال کُتَگَت ءُ بے گَم جَنگی ءِ لُٹّ ءِ سَر ءَ نِشتَگَت۔ کُچِکّ چَہ کاپَر ءِ مِنُکّا پاد اَتکَگَت ءُ آئی ءِ نَزّیک ءَ اَتکَگَت ءُ گۆں شِریشّ ئے بُنڈ ءَ وَتی بَڈّ ءَ گْوَرمۆش دَیَگ ءَ اَت۔
چَہ کَنوَری ءَ ھیرانانی کُٹینگ کَٹانگانی تَوار ءَ زانَگ بُوَگ ءَ اَت کہ رۆچ نێمرۆچ اِنت۔ اَنگَتَ آئی ءِ جێڈَگانی دَر نَبُتکَگَت کہ چَہ کَنوَری ءَ پیرێں جَنێںے ءِ تَوار ءَ آئی ءِ جێڈَگ نێمبُندَگ کُت اَنت:
"بْیا جِنِ، تَو سُہبیگێن اِنت شِریشّ ئے ساہِگ ءَ مێہ جَتَگ ءِ، وَتی مَرد ءَ بِبَر پَسیلّا آبدَستے کَنائین ءُ بْیا کہ کَنوَر ءِ وَہد اِنت۔"
آئی ءَ جێڈِت کہ دْرێگَتێں مَن نۆکبَرۆتێں وَرنا ءِ رَندپَداں بُشُتێناں۔
<سترُنگ><اِم>اِنام رَزا