مَن کہ شَنک آں پہ تَو!
جَنگ ءَ گۆں مَن مَیا
مِہر جَنگ ءِ سَر ءَ …
دِل کُج ءَ دَر کَپیت
واہَگانا کُشیت
بْیَیت ھَمۆدا کَسے
مارا دَست ءَ بِگیپت
چۆ وَ تَہنایا
تُرس نێست اَت مَن ءَ
آ تَہارێں شَپاں
تِبلێں دِل مئے گُڈیت
آزمانے کَپیت
آ چِراگاں کُشیت
مَن اِے تَہنایا
ھَردێں تَہنا باں
دِل تَئی یاتاں کَپیت
بَلکێں گۆن ئے گۆں مَن
بَلکێں چێر ئے اِد ءَ
رَند ءَ زاہِر کن ئے
کا ئے دێم ءَ مَنی
دَستاں گُلّ ءَ بَر ئے
کَند ءِ چار ئے مَن ءَ
چُکّ ءِ پێشانی ءَ
دَست ءَ ، دَست ءَ گِر ئے
ءُ مئے گۆش ءَ گُش ئے
جَنگ ءَ ھۆر ءَ رَوێں
نوں تَو تَہنا نا ئِے،
تُرس ھِجبَر نَیَیت
داں کہ مَن زِندَگ آں
بَرپێں دَستاں تَئی
اُپّ کَناں، گَرم کَناں
آ زِمِستانی شَپاں
تَئی سَماراں سَر ءَ
دانکہ تَو واب کَپ ئے
تاں مَن آگاہ باں
تاں ماں آگاہ باں
بْیَیت، کَسّے اَگاں
جَنگ ءَ گُن مَن بِکَن،
مَرچی اێمِن بُبُو!
وَشّ ءُ وَژدِل بُبُو!
واب ءَ دیستَگ پَدا
جَنگ ءَ مَن اێوک آں
یات اَت چۆکہ ھُدا
دِل مئے لۆٹیت تَرا
دِل مئے پہ تَو زَریت
بْیا اُو رۆکێں چِراگ
دیدَگاں رۆک کَن
مئے شَپاں نۆک کَن
بِہ تَو گْرَندے مَبُو
بِہ تَو دێراں مَرَس
مَن تَوارے بِیاں
تَو چۆ رۆکێں گِرۆک
بْیا ءُ جَلدی بِرَس
تَو کہ جَلدی رَس ئے
دِل مئے آگاہ بیت
پُورَہ واب ءِ تَہا
وابے ءَ بُست کَن
گِندیت دێم ءَ وَتی
آگَہ ئے اَنگَتا
چارَگ ءَ ئے مَن ءَ
مَن گۆں وَشّێں دِلے
کَنداں چاراں تَرا
چُکّاں دَستاں تَئی
تَو اوں چار ئے مَن ءَ
"تَو چۆ شَوک ئے چی ءَ ؟"
مَن گۆں جُست ءَ مِراں!!!
مِہر جَنگ ءِ سَر ءَ نَدر بیت ءُ گُشیت
بْیا اُو دیدَگ مَنی! یار جَنگ ءَ مِریت
<سترُنگ><اِم>شَہریار بَلۆچ