بِنا کَن اَنچێں آہے ناتَوانێں دِل جَہان ءَ سۆچ
کَبَسّ ءَ زُلم ءَ سَییاد ئے گۆں باگ ءُ بۆستانا سۆچ
کَئی بیم ءَ تَرا اِے زِندَگانی ءَ کُتَگ دَرگۆر
چَہ وَت سَرگوَز اِے بے رَہمێں زِمین ءُ آزمان ءَ سۆچ
سَدی گْوَست اَنت نِشانے مِنزِل ءِ ھَم گِندَگ ءَ نَیَیت اِنت
چُشێں گَلَگ ءَ چُشێں راہ ءَ ءُ چۆشێں ساربان ءَ سۆچ
پہ نان ءِ چُنڈے ءَ چۆرَو جَنۆزام لۆگ سَد گۆل اَنت
چُشێں کَوم ءِ لَجُوزێں، اِے اَمیر ءُ واجَہانا سۆچ
نہ اِلم ءِ شَوک نہ کَوم ءِ دۆستی نہ سُدّ دُنیا ءِ
چُشێں بے جَوہَر ءُ جاندُزّ ءُ سُستێں نَوجَوانا سۆچ
اِے بَدواہ اِنت تَئی، دَنت اِنت تَرا زێردَستی ئے سۆج ءَ
مَگِر پَنت ءَ اِشی ئے، وَژنَیَتکێں دُربَیان ءَ سۆچ
بِکَن پَہرێز چَہ اِے رِزکا کہ بارت اِنت نَنگ ءُ نامُوس ءَ
بِسِند پاند ءَ گُلامی ءِ اِے چَرپێں چُنڈێں نان ءَ سۆچ
بِبَند لانک ءَ بِکَن ھِمَّت زَمانَگ تێزرَپتار اِنت
نَہ اِنت اِے وَہد سُستی ءِ ناداں شَور ءُ تران ءَ سۆچ
ئے ساہِر گَپّ ءُ کِسَّہ شاِری ءَ پہ، دِگِہ باز اِنت
شَپ ءُ رۆچ وَشتَبێں مَہگۆنَگانی داستان ءَ سۆچ
<سترُنگ><اِم>مُراد ساہِر