بَہارسَنجێں، ھُمارێں دِلبَر
تَو پُلّ کَند ءِ کہ اَرس گْرێو ئے
مَن آں تَئی اِسرار وَت وَتی ئے
مَن آں تَئی بُنجاہ زِندَگی ءِ
مَن آں تَئی چَمّانی رُژن ءِ تَہریر
مَن آں کہ کایاں مُدام تَرا گیر
مَن آں تَئی لُنٹانی ھامَگێں پَنّ
مَن آں مَکَن تَئی، مَن آں تَئی کَن
مَن آں تَئی جیگ ءِ ٹَٹ ءُ ژَلانگۆک
مَن آں تَئی مَہکاں، مَن آں تَئی نۆک
مَن آں تَئی زَپتێں زَہیر ءُ تْرانَگ
ھَیال ءِ بُنزِہ مَن آں تَئی زانَگ
نْیاد ءُ اوستانی مانزَماں مَن
زَباد ءُ مِسکێں گَل ءُ گَم آں مَن
بَہارسَنجێں، ھُمارێں دِلبَر
تَو پُلّ کَند ءِ کہ اَرس گْرێو ئے
مَن آں کہ راہاں تَئی پُلّ رێچاں
بَرے نِہِنگ ءُ بَرے مَن کێچ آں
تَئی مَن سَہت ءُ تِلاہ ءُ زێوَر
مَن آں تَئی دُرّێں مَتاہ ءِ دَروَر
گِداں آں میدبَندێں! وَشّیانی
مَن آں تَئی دِلبَڈّی سَکّیانی
مَن ءَ تَو زان ئے، تَرا مَن زاناں
تَو آ جَہان ئے مَن اِے جَہاں آں
مَن ءَ مَتاپێں مَن ءَ مَرَنجێں
دِل ءِ ھَزانَگ مَن آں تَئی گَنجێں
نَباں مَن بے تَو، نَبَئے تَو بے مَن
ھُمارِن دِلبَر بَہارسَنجێں
بَہارسَنجێں ھُمارێں دِلبَر
تَو پُلّ کَند ءِ کہ اَرس گْرێو ئے
<سترُنگ><اِم>گُلام ھُسَین شۆہاز