مَنی وَتَن،
گۆں ھیر ءُ زاپِرانێں نَوبَتاں
پہ جَنگَلے ءَ سَر گِر ئے
مَن ءَ بُزُور گۆں
مَن اێوک ءَ مُلُور باں
اِے اَہد دیدَگاں وَتی
ماں اَرسی تْرَمپے ءَ
شُہازَگ ءَ بِبیت
زَمانَگانی کۆہسازێں چێدَگاں
رَمێز جێڈَگ ءَ بِبَنت
چَہ مَہپَرے چۆ مِہلَبانی باس ءَ دَر بَیَیت
مَنی تَوار اَچ مَن گیشَگ ءَ بِبیت
مَنی وَتَن مَن ءَ بِجێڈ
مَن ءَ تَوار پِر بِکَن
مَن اِشکُتَگ
کہ شَہراں رَنگ ءُ رۆگِنێں
کُلُہ کُتَگ تَرا
مَنی وَتَن مَن ءَ تَو دِل نَبَئے
ماں دیدَگانی نێمرۆچاں
نۆد بَندَگ ءَ بِبَنت
زَہیروارێں سینَگ ءَ
تَئی آس گْرێوَگ ءَ بِبیت تَرا
مَن ءَ وَتی نِگاہ ءِ کُورَہ ءَ بُشۆد
مَنی وَتَن مَن ءَ بِگرے
چِراگ تَند بَندَگ ءَ بِبَنت
ءُ آپ زَنگ پۆشَگ ءَ بِبیت
مَنی وَتَن تَو گیر بْیا مَن ءَ
مَنی وَتَن تَئی ساز مۆدَگ ءَ نَہ اَنت
مَن زِندَگ آں مَن ءَ بُزُور گۆں
مَن اێوک ءَ مُلُور باں
<سترُنگ><اِم>مُنیر مۆمِن