جی کَپۆت لُڈّۆک ءُ سُبَکبالێں
مُرگ زَہیرانی تْرَہ شَکَرگالێں
دَئے مَن ءَ اِہوالاں گُلێں لال ءِ
ٹیٹَل ءُ دابانی زَبادمال ءِ
کہ دِل مَنی بے بُود ءُ جَگَر رێش اِنت
سَر مَنی بے سار چَہ گَماں گێشێں
پْرۆشت مَن ءَ گێگے بے گْوَمێں زِند ءَ
دات اَجَب چَکمۆٹ جِند مَنی جِند ءَ
مُرتَگێں بالاد ءِ گِر ءُ چیل ءَ
آسے ماں داشتَگ مُہکَمێں ڈیل ءَ
ھَمسَر ءُ ھَمرَہاں گِسَر بیتاں!
کُت مَن ءَ بے گْواہ بے نَپێں سیتاں
چۆن شَمۆشاں مَن اێمِنێں ھَلکاں
رَتکَگێں گْوارچ ءُ آہِنێں تَلکاں
چۆن کَناں شَہجُواں وَتی بے ھال
ڈَڈَّر ءَ سَد بَر چِست بَنت چیہال
کۆدِکی لَیب ءُ ماں مَراگاہاں
چۆن شَمۆشاں مَن تْرامبَلێں ناہاں
گیر مَن ءَ کاینت سَکّ کُنِر لُبّێں
ساہ ھما جاہ اِنت کہ ھَمۆد ھُبّ اِنت
بَسّ کَن کُوکُواں مُرگ زَہیرانی
زْیات تَرا گۆن اَنت دْوا پَکیرانی
چَہ گَم ءُ اَندۆہاں جَگَر تْرَکّیت
سَر گُل ءِ اُگبالاں چِتَور رَکّیت
<سترُنگ><اِم>گُلام ھُسَین شۆہاز